La sidra DOP va tener una visibilidá especial nos hipermercaos Carrefour del país

|
Celestino Cortina y César López Sánchez conveniu DOP sidra y Carrefour

El Conseyu Regulador de la Denominación d'Orixe Protexida 'Sidra de Asturias' robló un conveniu de collaboración cola firma francesa.

El Llagar de Piñera, na parroquia xixonesa de Deva, acoyó la firma d'esti alcuerdu que va permitir qu'esta fidra fecho con mazana perteneciente a dalguna de 76 variedaes de mazana autóctona recoyíes pola DOP cultivaes nel país tenga una visibilidá especial nos seis hipermercaos que Carrefour tien n'Asturies. "Ye una declaración d'intenciones de Carrefour, que valora los productos llocales y de calidá", aseguró César López Sánchez, direutor institucional de la empresa n'Asturies tres emponderar el llabor del Conseyu Regulador.

El so presidente, Celestino Cortina apuntó que "tradicionalmente la sidra ta venceyada a la hostelería, pero nos años últimos entró nel sector de l'alimentación con fuercia, onde entovía esiste una ambigüedá", pa darréu afirmar "que la calidá ta nos productos cien por cien asturianos, los que lleven la etiqueta de DOP o IXP". Tres reconocer que "cuesta tar nel escaparate", felicitóse por esti alcuerdu con Carrefour que va permitir que la sidra DOP tenga un espaciu destacáu y señalizáu nos hipermercaos asturianos, tando'l conveniu restrinxíu namái a Asturies.

Contador Estadistiques