La sidra DOP estrena contraetiquetes

|
Contraetiqueta Sidra DOP

El Conseyu Regulador de la Denominación d’Orixe Protexida (DOP) ‘Sidra de Asturias’ camuda la imaxe de les contraetiquetes, con un diseñu más modernu. Éstes dexen de visibilizar el mapa d’Europa pa centrase namái nel d’Asturies y cuenta con una banda metálica y tinta invisble que dificulten la so falsificación.

Dende l’organismu califíquenles de “más llixeres, llimpies y profesionales”. Les destinaes a sidra natural tienen color verde con una barra platiada, mentes que les de sidra esplumosa son prietes cola banda dorada.

L'ilustrador Juan Hernaz, responsable de la versión n'asturianu del Quixote con torna de Pablo Suárez García o de la esposición ‘Voces. La llingua n’Asturies al traviés de los sieglos’,  encargóse del diseñu d’estes contraetiquetes, que se podrán ver nos chigres nuna o dos selmanes y que van convivir coles anteriores mientres dellos meses. El nuevu ye más seguru, al contar con dicha banda metálica y tinta invisible.

L’idioma de les mesmes va siguir siendo’l castellanu, al igual que l’emplegáu nel logu de ‘Sidra de Asturias’, que va apaecer na parte izquierda del mesmu. Na derecha atópase’l mapa d’Asturies, que sustitúi al d’Europa pa dar más visibilidá a Asturies, al entender el Conseyu Regulador que’l 80 por cientu del so consumu, a pesar del aumentu de la venta al esterior, se fai nel país; l’añu de la collecha; y la so numberación.

Folletu promocional nuevu

‘Sidra de Asturias’ presentó estos díes tamién el so folletu promocional nuevu. Nél apaecen les 76 variedaes de mazana autóctona cola que se fai esta bébora con DOP y tolos productos esistentes anguaño de sidra natural, sidra de mesa y sidra esplumosa.

Contador Estadistiques