La sidra DOP algama un récor nuevu de ventes: 4,7 millones de botelles

El Conseyu Regulador de la DOP Sidra d’Asturies presentó esti miércoles los datos correspondientes al añu 2019, cuando aumentaron les ventes un 27 por cientu, algamando les 4.791.000 contraetiquetes emitíes. “Ye un añu históricu” destacó’l conseyeru de Desarrollo Rural, Agroganadería y Pesca, Alejandro Calvo.

Los 33 llagares que producen sidra con Denominación d’Orixe Protexida (DOP) vendieron 1.025.000 botelles más que l’añu anterior, cuando se superara tamién el récor al colocar nel mercáu 3.766.000. Nel 2017 el total de contraetiquetes entregaes pol Conseyu Regulador foi de 2.170.500.

“Ye un añu históricu pa la Denominación d’Orixe ‘Sidra de Asturias’ qu’exemplifica mui bien el trabayu que se desendolcó nos años últimos y que nós recoyemos y a los que nos sumamos con entusiasmu”, apuntó Calvo, que tuvo acompañáu na presentación de los datos pol presidente del Conseyu Regulador, Tino Cortina, y pol direutor xerente del mesmu, Daniel Ruiz. “Tenemos un productu fuerte con gran singularidá, afitáu nuna cultura y una tradición, con variedaes autóctones; un trabayu qu’algamó un nivel de solidez y calidá que ye reconocíu polos consumidores, los primeros los propios asturianos”, añadió.

Dende’l Conseyu Regulador confirmaron que l’oxetivu pal añu 2020 ye superar los 5 millones de botelles. La producción de sidra DOP vien medrando añu tres añu dende’l 2014.