La Sidra de Mazana d'Escoyeta organiza la so tercer espicha solidaria frente al cáncer

Va celebrase esti vienres en Sariegu.

La Espicha Solidaria frente al Cáncer entámala per tercer añu la Sidra de Mazana d'Escoyeta, marca de calidá qu'agrupa a los llagares Trabanco, Muñiz, Peñón y Foncueva, en collaboración cola Fundación Sandra Ibarra de Solidaridad Frente al Cáncer col oxetivu de recaudar fondos pa financiar proyeutos d'investigación pa curar esta enfermedá. La cita ye esti vienres a partir de las 20.30 horas nel llagar de Trabanco en Sariegu, siendo'l preciu de la entrada de 25 euros, de los que 10 van pa la causa.

Esti añu la espicha va acoyer tamién un emotivu homenaxe a los y les escanciadores asturianos, representaos pola Asociación d'Escanciadores d'Asturies, y al periodista radiofónicu con raigón asturianu, José María García. Dambos recoyerán los sos gallardones nos V Premios Sidra d'Escoyeta, nun actu que va celebrase a les 19 hores.

“Animamos a toos aquellos que disfruten cola sidra a que participen nesta espicha solidaria. Ente toos podemos consiguir que'l cáncer se cure. Y un primer pasu ye contribuyir a proyeutos d'investigación, participando amás nun eventu que xune la tradición sidrera n'Asturies cola solidaridá frente al cáncer. Amás, esti añu servirá d'homenaxe a la figura del profesional escanciador de sidra, que tanto apoyu y reconocimientu merez, y al gran José María García, que tanto aportó a la radio n'España”, señala José Manuel Riestra, presidente de l'asociación qu'axunta a los cuatro productores que trabayen esta sidra fecha con variedaes de mazana asturiana.

Venta d'entraes

Les entraes p'acudir a la espicha yá tán a la venta nes oficines de los llagares Trabanco, Foncueva, Peñón y Muñiz, y na sidrería Casa Trabanco. Tamién se pueden acutar al traviés de la cuenta de corréu electrónicu info@sidramanzanaseleccionada.com.