La sidra cuerre per Nava

Celébrase la cuerentena primer edición del festival dedicáu a la bébora nacional.

Anque dende'l martes hai programaes actividaes, ye güei cuando comienza oficialmente'l IXL Festival de la Sidra de Nava. Pa esta nueche ta previsto'l llanzamientu de fueos artificiales y una verbena con Biorritmos y Ritmo Joven, mentes que mañana, día grande, van desendolcase la mayor parte d'actividaes.

De 11.30 a 13.30 hores va poder prebase na redolada del Muséu de la Sidra sidra fecho nel conceyu asina como productos gastronómicos, mentes que pal meudía ta prevista la final del Concursu a la Meyor Sidra Natural fecha n'Asturies y Nava nos soportales de la Casa Conceyu, con 41 competidores nesta edición.

La entrega de premios va tener llugar a les 20 hores, pa una hora depués entamar el chupinazu y comenzar la Ruta la Sidra. La música va ponela la Banda Gaites LaKadarma (17.30 hores), el grupu de percusión portugués Tocándar xunto colos bailles de La Flor del Pumar (18 hores) y, yá de nueche, la orquesta Nueva Banda y los pinchadiscos Javier Cuesta y DJ Nack.

Como ye vezu, ALSA y Feve van reforciar los servicios diurnos y nocherniegos de cara a facilitar l'asistencia al día grande la fiesta sidrera a ciudadanos d'otres partes del país.

Concursu d'escanciadores

El domingu, al meudía, va celebrase'l prestixosu XXXI Concursu Internacional Escanciadores de Sidra na plaza Manuel Uría, mesmu llugar onde va instalase'l XII Festival del Tortu. La verbena va ponela La Favorita, mentes que pal llunes tán previstos xuegos y actividaes pa neñes y neños nel área deportiva de Nava dende les 17 hores.