‘La sidra, con mazana d’Asturies’, eslogan de la DOP pa esti branu

|
Campaña branu DOP Sidra d'Asturies ‘La sidra, con mazana d’Asturies’

Los collecheros protagonicen la campaña de branu de Sidra d’Asturies p’animar al consumu d’esta bébora con Denominación d'Orixe Protexida (DOP). Va difundise per prensa, radio, televisión, redes sociales y soportes esteriores emplegando la imaxe de productores xunto col eslogan ‘La sidra, con mazana d’Asturies’.

La sede del Conseyu Regulador, en Villaviciosa, acoyó esta mañana l’actu de presentación d’una campaña que “torna a concentrase en protexer lo de nueso, conservar la tradición y volver al orixe, sofitando a los collecheros del Principáu al traviés de la demanda de Sidra d’Asturies, la única con mazana 100 por cien asturiana”. Va tener un llargor de 3 meses y informa al consumidor sobre la importancia que pal campu asturianu tien consumir la sidra producida baxo la etiqueta de la DOP.

Na cartelería, como se venía faciendo estos meses pasaos, rescampla la imaxe de dellos productores delantre los sos pumares xunto col lema escoyíu, con dos versiones, n’asturianu y en castellanu –‘La sidra, con manzana asturiana’–. Amás, la campaña tamién se va llevar a soportes como la radio y la televisión.

Na semeya, Guillermo Guisasola, presidente de la DOP Sidra d’Asturies; Begoña López, direutora xeneral de Desarrollu Rural y Agroalimentación; los productores Delfina Llera, Cesáreo Ferreras y Eduardo Cortés; y Daniel Ruiz, xerente de la DOP.

Contador Estadistiques