La sidra asturiana n’An Oriant: “enseñamos la nuesa cultura y los bretones enséñennos la de so”

Quinientes caxes de sidra de Prau Monga, la DOP de Viuda de Angelón, y de la de Quelo viaxaron d’Asturies a An Oriant pa ser consumíes nel chigre d’Asturies nel LI Festival Interceltique de Lorient. “La xente d’equí pruébala y comparte la so esperiencia cola bretona; enseñamos la nuesa cultura y ellos enséñennos la de so”, rellata Jairo Andrade en compañía de Froilán García y Laura Ovín.

Esti navetu ye ún de los echadores que tuvieron del 5 al 14 d’agostu n’An Oriant, nel Année des Asturies, representando la cultura sidrera asturiana y dando a conocer l’escanciáu a los munchos interesaos que s’averaron pa consumir la nuesa bébora nacional. “Esto ye espectacular, lo nunca visto. Toi encantáu equí. Hai ambiente tolos díes y la xente vien a prebar la sidra”, rescampla.

Xunto a Andrade atopamos a García y Ovín, anque son más los que componen l’equipu d’echadores desplazaos a Breizh. “Ye la mio primer vez equí. L’ambiente ye mui amenu, con gaites a toes hores, que ye lo típico, y la sidra nun pue faltar”, señala él.

Repite pela so parte Ovín, “anque la primer vez foi va munchu tiempu, más de 20 años”. “La sidra ta de moda y sal porque Asturies tamién ta de moda”, esclama enates de referise al Interceltique como “un festival de 10”.

Bones ventes

Los trés amuésense encantaos cola esperiencia y col interés qu’amuesen los bretones y visitantes con respeuto a la sidra, que taba a la venta a un preciu de 6 euros. “La xente d’equí pruébala y comparte la so esperiencia cola bretona; enseñamos la nuesa cultura y ellos enséñennos un poco la de so”, apunta Andrade tres la barra d’un chigre qu’abría les sos puertes a les 12 hores, hasta la 1.30 de la madrugada, y servía tamién sidra con miel y con limón de Viuda de Angelón.

“¿De ventes? Meyor de lo qu’esperábamos”, apuntaba l’echador nel ecuador d’un festival nel que se promocionó la candidatura ‘Cultura Sidrera Asturiana’ a Patrimoniu Cultural Inmaterial nun eventu celebráu na tarde del martes 9 con presencia de cinco de los seis alcaldes de la Mancomunidá ‘Comarca de la Sidra, el presidente Adrián Barbón y la conseyera de Cultura Política Llingüística y Turismu, Berta Piñán.

Na semeya, García, Ovín y, tres la barra, Andrade.