La SGAE arremete tres del fracasu de la Llei Sinde

El presidente de la SGAE, Teddy Bautista, asegura qu'ésta "nun va ser la última nin la más dura de les batalles", en referencia a la defensa de los derechos d'autor y el refugu na Comisión d'Economía del Congresu de la llamada 'Llei Sinde'.

Dende la páxina web de la SGAE, el so presidente reclama al mundu de la cultura una "respuesta diseñada", meditada y, sobremanera, "intelixente y ponderada".
  
"Nun somos nós los principales perxudicaos nesta situación; ye la ciudadanía, que se va ver quitada a mediu y llargu plazu d'un ricu patrimoniu cultural común, d'un imaxinariu colectivu que, dende'l principiu de los tiempos, los creadores y artistes, los científicos y inventores, construyeron pa favorecer el desarrollu intelectual y económico de los pueblos", alega Teddy Bautista.

Nesta mesma llinia, "anima a los compañeros" a pidir esplicaciones "seles y respetuoses", pero "firmes y argumentaes", de "por qué quieren privamos d'unos derechos que tán reconociéndose na mayoría de países del nuesu entornu".

Coles mesmes, pide que s'escriba a políticos y medios de comunicación y se manifieste nes redes sociales "la frustración" de sentise "ciudadanos de segunda". "Privaos de los mesmos derechos qu'esfruten los trabayadores manuales o los profesionales lliberales, esto ye, del derechu a vivir simplemente del to trabayu y a que se respeten los tos derechos d'autor, que ye'l salariu de los creadores".

González-Sinde
La ministra de Cultura, Ángeles González-Sinde, afirmó que nun tien pensao dimitir, y aseguró que van siguir trabayando pa buscar un modelu "satisfactoriu pa toos", con motivu del fracasu de la disposición segunda final de la Llei d'Economía Sostenible, conocida como 'Llei Sinde', refugada nel Congresu.
  
Sinde declaró ante los medios que nun pensó na posibilidá d'abandonar el Ministeriu de Cultura y calcó en que fai'l so trabayu pa un presidente de Gobiernu que "tien esa posibilidá de cesar y nomar ministros cuando lu considere".
  
En cuanto al resultáu de les votaciones d'ayeri, la ministra de Cultura sorrayó que "ún nunca sabe cómo van salir, neso consiste la democracia". "Cada grupu políticu espresa los sos convencimientos y toma les sos decisiones hasta'l últimu momentu de votación", señaló.

Sicasí, cree que tolos partíos taben d'acuerdu en que "hai qu'atopar alguna fórmula y alguna solución a la compatibilidá de los derechos de toos na rede". "Lo que tenía cada grupu yera una opción distinta, un modelu distintu", añade.

 Por ello, asegura que'l Gobiernu "va siguir trabayando" en buscar un modelu que seya "satisfactoriu pa toos" y va siguir dando respuesta a "esta situación", dao que, según señala, "el compromisu cola defensa de la propiedá intelectual y el compromisu coles industries culturales y el so potencial de desarrollu económicu, y el so potencial de xeneración d'empléu, pasa inescusablemente pela rede y ye una prioridá pal Gobiernu".

Nesti sen, Sinde señaló qu'esti añu tán analizando cuálos puen ser los siguientes pasos pa siguir nesi camín de "defensa de la propiedá intelectual, d'atopar esa fórmula que permita a los usuarios la posibilidá d'aportar a conteníos llegales na rede, a precios algamadizos, que nun persigan y criminalicen a los usuarios".