La sesión constitutiva de la Xunta Xeneral va celebrase’l 15 de xunu

El BOPA d’esti llunes espubliza'l decretu robláu pol presidente d’Asturies en funciones, Vicente Álvarez Areces, pol que se convoca la sesión constitutiva de la Xunta Xeneral. Ésta va celebrase’l 15 de xunu, miércoles, a les 12 hores.
 
La sesión constitutiva va ser presidida de forma inicial por una mesa d’edá formada pol diputáu eleutu de mayor edá como presidente y los dos más mozos en calidá de secretarios. Darréu, va procedese a la eleición del presidente y demás componentes de la Mesa de la Cámara.
 
Tres esta primer votación, les persones escoyíes van ocupar los sos puestos na mesa y tolos diputaos van pasar a xurar o prometer la Constitución estatal y l’Estatutu d’Autonomía. Por último, enantes de llevantar la sesión, el presidente va declarar constituyida la Cámara. Nesta llexislatura cuatro partíos van tener representación na Xunta Xeneral: FAC (16 escaños), PSOE (15), PP (10) y IX-LV(4).