La Semiente recuerda l'incumplimientu de la toponimia oficial en Samartín del Rei Aurelio

|
Normalización Llingüística de Samartín del Rei Aurelio en FEMEX 2014

El centru social autoxestionáu presentó un escritu al Conceyu concidiendo con esti 21-F, Día Internacional de la Llingua Materna.

"La toponimia oficial del conceyu de Samartín del Rei Aurelio foi aprobada fai yá 11 años, en febreru del 2008, y recueye un total de 484 denominaciones que pasaron a ser el nome oficial a tolos efectos d'eses poblaciones. Una década dempués, dende La Semiente vemos que nun se respeta, siendo un simple papel moyáu", denuncien al tiempu que recuerden la campaña del 2013 entamada dende'l gobiernu municipal pa dar a conocer y promover la toponimia recuperada.

Ésta llevaba'l nome de 'Los nomes de llugar nun tienen preciu' y consistió na edición de 2.000 chapes metáliques nes qu'apaecíen recoyíos un total de 52 topónimos de pueblos como Sanamiés, La Güeria, L´Acebal, La Envernal o La Potoxa, ente otros. Completábase con pagadielles y cartelos.

"Dende La Semiente consideremos esa campaña como daqué positivo na sensibilización escontra l'usu de los topónimos tradicionales. Daqué que contribúi a la normalización y recuperación del nome de los nuesos pueblos. Pero entá asina considerábamosla vacía d'intenciones y como un meru actu de 'bona publicidá' con ciertes dosis d'hipocresía. Y por ello anímabamos al conceyu dar más pasos reales". Cinco años depués, apunten, "vemos cómo nun nos faltaba razón y nun s'avanzó nada nesi sentíu".

Midíes

Aprovechando'l Día de la Llingua Asturiana, esti centru social asitiáu en L'Entregu presentó un escritu al Ayuntamientu pa "que'l mesmu Conceyu tamién s'aplique'l cuentu que cuntaba naquella campaña del 2013 y respete él mesmu los nomes de los sos pueblos. Que tome midíes, pa que toles empreses, asociaciones, clubes deportivos, comerciantes, entidaes bancaries, etc. del conceyu usen dicha toponimia". Tamién pa que "toles referencies escrites sobro los pueblos del conceyu, yá sían de prensa, publicidá, guíes de turismu, cartografía, etc., respeten dicha toponimia oficial" y que s'incluya en "publicaciones, comunicaos de prensa, documentación y demás escritos del conceyu", asina como nes rotulaciones y señales.

"Consideramos que namás d'esta forma puede faese ver énte la sociedá que realmente apuesten por daqué qu'ellos mesmos aprobaron fai yá once años y qu'hasta el momentu dio poques resultancies", sentencien.

Proyeición de 'Los labios apretados'

Esta tarde, a les 19.30 hores, el CSA La Semiente va acoyer la proyeición de los 'Los labios apretados', primer llargumetraxe de cine documental contáu en primer persona sobre la Revolución d'Ochobre del 34. El so autor, que va participar nun alderique col públicu, ye Sergio Montero 'Monti' , que "narra la hestoria ensin cuntar de la revolución asturiana, cavilgando sobre cómo una sociedá tresmite la so memoria a les siguientes xeneraciones”.

Na semeya, chapes de la campaña 'Los nomes de llugar nun tienen preciu' nel espaciu dedicáu a la normalización llingüística en Samartín del Rei Aurelio en FEMEX 2014.

 

Contador Estadistiques