La Semiente entama un amagüestu en L’Entregu pa los vecinos

Grandes y pequeños van disfrutar esti vienres d’un amagüestu en L’Entregu. El CSA La Semiente repite esta iniciativa tres l’ésitu del añu pasáu, onde decenes de vecinos y visitantes disfrutaron de les castañes y de la sidra dulce.

L’amagüestu va principiar a les 18 hores n’El Parque La Llaguna –nel casu de lluvia pasaría a la Plaza d’Abastos– con actividaes dedicaes a los neños y neñes. Asina, los más pequeños van poder disfrutar mayando mazana o faciendo manualidaes mientres tolos asistentes comen castañes y beben sidra dulce. Yá de nueche, alredor de les 21 hores, la folixa va treslladase a la sede del Centru Social Autoxestionáu La Semiente, asitiada na cai Eladio Jove. Ehí los presentes van disponer d’un escenariu abiertu onde habrá sitiu pa la música, la poesía o’l monólogu. Nesta fiesta va tar presente Cerveza Caleya, la primera artesanal d’Asturies, producida por dos miembros de La Semiente.

Dende’l centru social entreguín quieren con esti amagüestu puxar por una actividá mui venceyada a la ‘nueche de los difuntos’, de tradición céltica, con tantu raigañu nel nuesu país. “Entá güei en munches aldegues d'Asturies caltiénse la tradición de poner calabaces agüecáes con forma de cabeza pelos caminos o en fuera les cases. Anque paeza mentira, esti iconu de les calabaces vuelve agora a los nuesos llares non por recuperación de parte de la nuesa cultura, sinón por influencia del consumismu americanu, cola so propia versión del Halloween, qu'estos díes va anubrir de fiestes munchos pubs en forma de promociones y demás y que pocos o nengún van rellacionar col nuesu tradicional amagüestu y nueche de los muertos”.