La Semiente echa a andar con una proyeición na cai de semeyes de L’Entregu y de la so xente

Esti vienres va celebrase la primer actividá de l’Asociación Cultural La Semiente, coleutivu de L’Entregu que quier dinamizar la vida cultural y social de la cuenca’l Nalón. A les 22 hores ta prevista una proyeición de semeyes actuales y antigües del pueblu.
 
Esta asociación cultural naz al mesmu tiempu que’l Centru Cultural La Semiente, asitiáu na cai Eladio Jove númberu 6, que va ser sede de la mayor parte de les actividaes que va poner en marcha’l coleutivu. Sicasí, nesta presentación, los responsables de La Semiente prefirieron salir a la cai pa llevar el proyeutu a tolos ciudadanos de L’Entregu, yá que l’oxetivu ye dinamizar la vida social y cultural del pueblu y de toda la cuenca’l Nalón.
 
‘L’Entregu, ayer y güei’ ye’l nome de l’actividá que va tener como sede l’andén de la estación antigua de Renfe a partir de les 22 hores. Los asistentes van poder contemplar semeyes actuales y vieyes de L’Entregu y de los sos habitantes, amás de sentir la música del productor Ceeres. Una actividá prestosa na que collabora muncha xente con fotografíes que taben bien guardaes nos caxones de casa. La intención de La Semiente ye repetir esta actividá en toles poblaciones de la cuenca’l Nalón.
 
“Ante la desidia, la desmovilización, l’apatía, la falta de perspectives y la monotonía, un grupu de xente con inquitúes decidió xuntase pa facer coses pola zona na que viven. Xente de lo mas variao, dende estudiantes a paraos/es, trabayadores en precario, xubilaos/es… Xente que cansao de ver como la sociedá de les cuenques agoniza, decide tomar la iniciativa y faer coses. Ye ansí como xurde l’Asociación Cultural La Semiente, que pon en marcha un centru social autoxestionáu dende’l que coordinar toes eses acividaes. Un centru que naz cola idea de tar abiertu a toles persones que quieran participar, ansí como tamién a qu’otros coleutivos o asociaciones puedan usar esi espaciu tanto pa reunise como pa realizar acividaes. Dende el Centru Social La Semiente quieren faese actividaes culturales y sociales qu’abarquen tanto cuestiones locales a otres d’indole global e internacional, como puen ser los conflictos en distintes partes del mundu”, señalen los responsables de l’asociación. L’oxetivu de La Semiente ye poner en marcha una biblioteca y vidiotequea, faecr talleres, crear un grupu de consumu, un mercau d’intercambiu y convertir el centru nun puntu d’información.
 
Nos díes próximos, el Centru Cultural La Semiente va acoyer delles actividaes, como un ciclu de cine-forum entituláu ‘Cine y música’ que va proyeutar películes tolos miércoles a les 20 hores y que va tar abiertu a tol mundu. Tamién ta prevista una ‘timba poétika’ pal 6 de mayu que va amestar música y poesía coles téuniques audiovisuales más modernes. Nella va participar DJ Antistailo xunto con Pablo X. Suárez, Miguel Allende, Sergio S. Toboada y Suarón, amás de dellos poetes llocales. Y coincidiendo con mayu del 68, ta prevista una charra-alderique sobre los movimientos estudiantes, con fecha por confirmar. Otra manera, La Semiente tamién entama, nesti casu en Ciañu y xunto col Fondo xUnitariu de Solidaridá Obrera (FUSOA), la Folixa del Primeru Mayu, que va contar coles actuaciones d’Arma X, La Tarrancha, Skama la Rede y los catalanes Insershow.