La Semiente acueye una xornada feminista

Con motivu de la cercanía col 8 de marzu, Día Internacional de la Muyer, cuando ta convocada una Fuelga Xeneral Feminista.

El coleutivu feminista Acción Aquelarre y el Centru Social Autoxestionáu La Semiente entamen el sábadu esta Xornada Feminista en L'Entregu, con espaciu pa la información, l'alderique, la confraternización, la reivindicación y la festividá. La presentación del númberu últimu de la revista 'La Madeja', col nome 'Sexualidades', va encargase d'abrir les actividaes, pa siguir a les 14 hores con un "culete vermuteru de confraternización" y una xinta popular.

Pela tarde, a les 17 hores, va proyeutase'l documental 'Él nunca me pegó', con una alderique posterior sobre la violencia machista non física. Yá a les 19 hores, les y los participantes van salir a la cai pa entamar una marcha per L'Entregu tres la pancarta 'A pola Fuelga Xeneral Feminista', convocada pal 8 de marzu: "Queremos denunciar con esta movilización non yá la violencia machista, sinón tamién plantegar que vamos parar: nel trabayu, pa denunciar que la división sexual del trabayu conderga a les muyeres a la precariedá; nes aules, porque reivindicamos una educación pública, laica y respetuosa cola diversidá sexual; parar de curiar, pa visibilizar el trabayu de reproducción y cuidos, concenciar sobre ellos y la so redistribución; parar de consumir, porque fai falta repensar n'otres maneres de consumir más respetuosos col mediu ambiente y les nueses vides", espliquen les organizadores.

Va finar la Xornada Feminista un conciertu de hip a hop, a partir de les 21 hores, con Guaja D, Dana y Ely Swing, "trés cantantes moces pero con un ampliu camín dientro de la escena y que nun van dexar indiferentes a les asistentes".