La selmana en bolsa

Los mercaos bursátiles tuvieron una bona selmana esperando pola reunión de la Reserva Federal que tien en vilo a tola comunidá inversora. La selmana foi de más a menos terminando'l vienres con cayíes por culpa de los datos macroeconómicos d'Estaos Xuníos y Alemaña y poles duldes sobre delles empreses.

El datu de xorrecimientu del PIB d'Estaos Uníos tiró p'abaxo peles bolses na última xornada de la selmana. Anque la medra de la primer economía del mundu foi del 3,9%, el resultáu tuvo perbaxo del 4,4% esperáu.

Na Zona Euru'l superávit por cuenta corriente d'abril algamó un resultáu de 9.000 millones d'euros, dientro de les previsiones. N'España los precios de producción interanual foron del 3,8%. Pero les anuncies más importantes de la selmana xunta'l datu del PIB norteamericanu foi'l datu del IFO alemán, permalu al algamar solo unos 94,6 puntos cuando los economistes esperaben más de 96.

Pieslle mistu de les bolses de Nueva York. L'índiz Dow Jones algamó los 10.379,58 puntos lo que supón una perda del 0,62%. L'índiz tecnolóxicu Nasdaq tuvo un resultáu positivu con una xuba del 0,49% hasta los 2.025,47 puntos. Nel Vieyu Continente Francfort peslló en positivo mentanto que Llondres y París perdieron sobre'l 0,3%.

La Bolsa de Madrid foi'l mercáu más castigáu d'Europa'l vienres anque con too y con ello foi quien a caltener una selmana en positivo con una probetaya xuba del 0,6%. Perimportante volume de negociu con más de 4.550 millones d'euros gracies poles grandes operaciones nos valores SCH, Endesa y l'acabante d'estrenar de Telecinco. L'Ibex-35 trancó la selmana nos 8.120.50 puntos, calteniendo la cota sicolóxica de los 8.000 y empatando la sesta selmana en positivo. Permala selmana pal bancu d'Emilio Botín ya que'l SCH tuvo unes perdes penriba'l 2,5%. Estes perdes vienen del ruxerux del interés del bancu santanderín na compra del británicu Abbey. Tamién tuvieron nel terrén de les perdes el BBVA, TPI y Arcelor. Ente les ganancies destaquen la gallega Zeltia, ACS y NH Hoteles.

L'anuncia de la selmana foi ensin duldes l'ésitu de la OPV de Telecinco qu'algamó una xuba del 17% el primer díi de cotización. L'acción de la canal de TV val yá 12,29 Euros lo que supón valorar la empresa en cerca de 3.000 millones d'euros.

Nel mercáu enerxéticu'l petroleu sigue calteniendo una tendencia a la baxa dempués de la xuba de producción de los países de la OPEP. Dempués d'algamar a lo llargo de delles selmanes la cota de los 40 dólares barril nos últimos díes ta afitando posiciones na raya de los 35 dólares barril. De toles formes los riesgos tan mui presentes énte les males perspectives del preciu del petroleu pola situación política de dalgunos países productores, les menguaes reserves enerxétiques d'Estaos Xuníos, la ocupación d'Iraq y el xorrecimientu del consumu nel mundu.

El mal datu del IFO Alemán tiró p'abaxo de la divisa europea hasta asitiase nos 1,215 dólares unidá.

L'euru sigue resistiendo'l bon comportamientu del dólar anque va pegar dellos blincos les próximes selmanes énte la importante cantidá d'anuncies macroeconómiques que van dase lo que pue afectar sobremanera a la so cotización. Nel mercáu de renta fixo los bonos a diez años tuvieron una xuba de rindimientu, algamando'l bonu alemán una rentabilidá del 4,309