La selmana de los tebeos

A lo llargo de toa esta selmana celébrase en Xixón el Salón Internacional del Cómic, una de les cites más prestixoses sobre esti arte que, depués de facese bien popular nos años 80, lleva dende va años nuna crisis que nun tien traza d'acabar, anque'l salón de Xixón parez que si que ta saliendo a flote. De va unos años p'acá, el mayor presupuestu y la meyor organización tan trayendo a Xixón a los debuxantes y guionistes más nomaos de la escena mundial, lo mesmo europea qu'americana, ente los que rescampla esti añu la presencia de Georges Bess o Geoff Johns, guionista d'importantes series americanes que tien collaborao col cine. Sicasí, el salón d'esti añu ta dedicáu, per un lláu, a rescatar la obra inédito del pintor asturianu Eduardo Úrculo, qu'entamó escarabayando monigotes y pintando tebeos cuando diba al institutu nes cuenques, y, d'otra, a facer un repás al papel de la muyer nel mundu del tebéu, tradicionalmente remanáu siempre por paisanos. Trece muyeres guionistes y debuxantes, representando deseparaos periodos na evolución d'esti arte, espondrán el so puntu de vista y contarán la esperiencia d'elles. Les pioneres del tebéu español van compartir protagonismu coles debuxantes americanes profesionales como Trina Robbins, Marie Severin o Posy Simmonds, debuxante del periódicu inglés The Guardian.