La Selmana de les Lletres va llevar el teatru n’asturianu a tolos llugares

La oficina de Política Llingüística que dirixe Ramón d'Andrés tien yá peslláu'l programa de la Selmana de les Lletres 2006, que va tar dedicada al teatru n'asturianu, con atención especial pa les obres más de recién pero ensin escaecer xéneros clásicos como'l del costumismu. Más de venti representaciones distintes de tolos xéneros van llevar la escena n'asturianu a los espectadores de toles edaes y conceyos d'Asturies nuna selmana que va entamar el 28 d'abril y que va espurrise hasta'l 7 de mayu.

La selmana de les Lletres 2006 va entamar oficiosamente'l vienres 28 d'abril cola presentación a les 12 del mediudía na biblioteca d'Uviéu del llibru "En tables. Un teatru pal sieglu XXI" de Dolfo Camilo Díaz, mientres qu'a les 8 de la tarde va celebrase na Capiella de los Dolores de Grau un espectáculu que baxo'l nome "Voces paraleles" va axuntar a poetes d'Asturies y de Cataluña, tando previstos los nomes de Berta Piñán, Xuan Bello, Vanessa Gutiérrez y Xandru Fernández pela parte asturiana y los de Ponç Pons, Núria Martínez Vernis, Àngels Gregori y Jordi Cornudella pela catalana.

La inauguración oficial de la selmana va ser el vienres 29, un día en que van presentase nel Campus del Milán d'Uviéu les Xornaes de Teatru "Universidá n'escena" aniciu d'una intensa actividá teatral que va llevar a los escenarios más estremaos teatru n'asturianu de tolos xéneros, entamando pola representación de la obra inaugural del teatru na llingua del país: "L'ensalmador, d'Antón de Marirreguera, a cargu de la compañía "Telón de Fondo". Amás d'esta obra, van pasar peles tables les obres " Ente bambalines. El teatru que lleves dientro" poema dramático-musical interpretáu pola Banda de Música de Corvera dirixíu por Jesús Cracio, la "Xulia" d'August Strindberg. Na versión de "Teatro Margen", "Fifina y Rufona" de Montserrat Garnacho y dirixida por Eladio de Pablo, "Puntu y coma" de Dolfo Camilo Díaz, pola Compañía "Higiénico Papel" o Una hora ensin televisión, de Jaime Salom, pola Compañía "Telón de Fondo" ente otres. El costumismu tien tamién güecu acutáu cola representación de "Interdictu o pleitín d'aldea" de José María Malgor, pola Compañía Asturiana de Comedies o "La herencia del tíu" d'Eloy Fernández Caravera, pola Compañía "El Hórreo". El teatru en gallego- asturianu apaez tamién pel programa cola representación de la obra Informe pra úa academia, de Franz Kafka, pola Compañía "Bacanal Teatro" o Úa de romanos, de Manuel Núñez, pol Grupo de Teatro "Penedo Aballón", mientres que les formes más populares del xéneru van espeyase en representaciones como la comedia de guirrios "Llegó la modernidá" obra de l'Asociación pola Recuperación de los Sidros y les Comedies.

Amás de la celebración del Día del Llibru y el discu n'asturianu, col avezáu descuentu del 10% nos establecimientos collaboradores, la Selmana de les Lletres tamién va valir pa presentar dellos llibros y materiales audiovisuales rellacionaos col asturianu, ente ellos el DVD "Pieces, de obres teatrales y poétiques" a cargu de Javier Maqua y Ramón Lluis Bande o la obra "Del Chigre" del monologuista Carlos Alba Cellero.

El Seminariu de Filoloxía Asturiana y Departamentu de Filoloxía Española de la Universidá d'Uviéu collaboren tamién con un ciclu de conferencies sobre'l teatru n'asturianu que van tener llugar nel Salón d'Actos de la Biblioteca del Campus del Milán d'Uviéu. Dientro d'esti ciclu Boni Ortiz va falar de "Felipe Villa y la dignificación del teatru costumista asturianu", mientres que Montserrat Garnacho tien prevista la ponencia "De la caleya a la tarima. Cuentos pal teatru".