La Selmana de les Lletres quier llegar a toa Asturies

La XXVII "Selmana de les Lletres Asturianes" que va entamar esti vienres 28 d'abril y que va durar hasta'l 7 de mayu embaxo'l títulu "Teatru a escena. Cuatro sieglos nel actu" va llevar a diecisiete compañíes distintes a actuar en ventiún conceyos aasturianos. El director xeneral de Promoción Cultural, Carlos Madera, y el director de la Oficina de Política Lingüística Ramón de Andrés, presentaron esta mañana la programación d'esta selmana que quier ufiertar "teatru por y p'asturianos" sorrayando Carlos Madera la descentralización, espardimientu y diversidá de los cuarenta actos programaos pa esta edición per tola xeografía asturiana contra la Selmana de les Lletres del 2005, la primera que se-y dedicó a ún xéneru y non a un autor concretu, pero que se centró esclusivamente na capital asturiana.

Ramón d'Andrés aclarió que'l fechu d'escoyer el teatru como protagonista suponía un homenaxe y un reconocimientu a los que vivíen por y pal teatru, ello con ser un xéneru un tantu escaecíu tradicionalmente. D'Andrés presentó los actos más importantes del programa d'esta Selmana de les Lletres que yá adelantare Asturies.com el pasáu miuércoles y que van entamar cola presentación del llibru "En tables. Un teatru pal sieglu XXI", de Dolfo Camilo Díaz y nel que rescampla tamién la presentación el día 2 de mayu d'un recital de poetes asturianos y catalanes, la bayura de representaciones teatrales o la inauguración d'una escultura conmemorativa del teatru obra de Fidel Pena que col títulu "Ente bambalines" va llantáse énte'l teatru Palacio Valdés d'Avilés.

Al ser el protagonista'l teatru, los escenarios asturianos van tar tomaos tola selmana de representaciones, entamando pola representación de la obra inaugural del teatru na llingua del país: "L'ensalmador, d'Antón de Marirreguera, a cargu de la compañía "Telón de Fondo" que va facese n'Uviéu. Amás d'esta obra, van pasar peles tables les obres " Ente bambalines. El teatru que lleves dientro" poema dramático-musical interpretáu pola Banda de Música de Corvera dirixíu por Jesús Cracio, la "Xulia" d'August Strindberg. Na versión de "Teatro Margen", "Fifina y Rufona" de Montserrat Garnacho y dirixida por Eladio de Pablo, "Puntu y coma" de Dolfo Camilo Díaz, pola Compañía "Higiénico Papel" o Una hora ensin televisión, de Jaime Salom, pola Compañía "Telón de Fondo" ente otres. El costumismu tien tamién güecu acutáu cola representación de "Interdictu o pleitín d'aldea" de José María Malgor, pola Compañía Asturiana de Comedies o "La herencia del tíu" d'Eloy Fernández Caravera, pola Compañía "El Hórreo". El teatru en gallego- asturianu apaez tamién pel programa cola representación de la obra Informe pra úa academia, de Franz Kafka, pola Compañía "Bacanal Teatro" o Úa de romanos, de Manuel Núñez, pol Grupo de Teatro "Penedo Aballón", mientres que les formes más populares del xéneru van espeyase en representaciones como la comedia de guirrios "Llegó la modernidá" obra de l'Asociación pola Recuperación de los Sidros y les Comedies

Amás de la celebración del Día del Llibru y el discu n'asturianu, col avezáu descuentu del 10% nos establecimientos collaboradores, la Selmana de les Lletres tamién va valir pa presentar dellos llibros y materiales audiovisuales rellacionaos col asturianu, ente ellos el DVD "Pieces, de obres teatrales y poétiques" a cargu de Javier Maqua y Ramón Lluis Bande o la obra "Del Chigre" del monologuista Carlos Alba Cellero.

El Seminariu de Filoloxía Asturiana y Departamentu de Filoloxía Española de la Universidá d'Uviéu collaboren tamién con un ciclu de conferencies sobre'l teatru n'asturianu que van tener llugar nel Salón d'Actos de la Biblioteca del Campus del Milán d'Uviéu. Dientro d'esti ciclu Boni Ortiz va falar de "Felipe Villa y la dignificación del teatru costumista asturianu", mientres que Montserrat Garnacho tien prevista la ponencia "De la caleya a la tarima. Cuentos pal teatru".