La Selmana de les Lletres llega a L.lena

El Conceyu de L.lena, ún de los que cuenten con Serviciu de Normalización propiu, va celebrar con cine, lliteratura y xuegos la XXV Selmana de les Lletres Asturianes. Ente los actos programaos, la rede de biblioteques municipales de L.lena va acoyer na Selmana de les Lletres una esposición de llibros y música en llingua asturiana. La intención ye averar a los ciudadanos la llingua asturiana al traviés de la lliteratura, la música y la investigación.

La muestra ye'l puntu de partida d'una campaña más amplia que pretende que los usuarios de las biblioteques saquen en préstamo más llibros y música en llingua asturiana, too ello enxerto nun plan qu'entamaagora y que lleva como eslogan "Lléi llibros y siente música n'asturianu. Porque l'asturianu ye lo nueso" y queva a desarrollase a lo llargo de tol añu

Toles actividaes pa nenos y mozos que se desendolquen n'Espaciu Xoven Juvelena tamién se van dedicar esta selmana a la llingua asturiana. Va haber xuegos y otres opciones d'ociu cola llingua asturiana como filu conductor, dirixíes a distintes edaes y siempre col oxetivu d'usar el xuego p'averar la llingua asturiana a la mocedá.

Los rapacinos tamién van estrenar una sección n'asturianu, que va tener continuidá n'acabando la Selmana de les Lletres, nel programa que tien na radio local l'Institutu de Secundaria Benedicto Nieto,

Ún de los actos centrales d'esta Selmana de les lletres na Pola L.lena va ser la proyección nel salón d'actos de la Casa de Cultura de La Pola esti xueves a les 19 hores, d'un ciclu de curtiometraxes en llingua asturiana.