La seleición nacional de fútbol centra una charra nel Llar La Llegra

|
Charra seleición asturiana La Llegra

Lleva'l títulu de 'Del secuestru de la seleición asturiana de fútbol a un modelu d'empoderamientu social del deporte asturianu' y va celebrase esti vienres.

Nel 1915 nacía l'actual Real Federación de Fútbol del Principáu d'Asturies baxo'l nome de Federación Rexonal Cantábrica de Clubes y siete años depués debutaba la seleición asturiana en competición oficial, que xugaría'l so partíu últimu, un amistosu, nel 1936. Nun sería hasta l'añu 2000 cuando los asturianos pudieron disfrutar de la so seleición nacional otra vuelta, cuando l'organismu federativu concertó un amistosu con Macedonia qu'enllenó'l Carlos Tartiere Nuevu. El resultáu final foi un 1-0 gracies a un tantu de Juanele.

Depués siguieron dos choques más nes Navidaes siguiente, contra Lituania n'El Molinón (6-1) y contra Honduras nel Suárez Puerta (5-3). Seríen les esperiencies últimes del nuesu combináu nacional de fútbol, yá que depués namái se celebraríen partíos amistosos de les seleiciones de balonmanu, voleibol o ḥoquei patinos.

Estos trés partíos de fútbol qu'abrieron esta serie d'alcuentros con otres seleiciones en dellos deportes "valdrá pa texer un filo conductor que nos lleva a analizar los estremaos modelos vindicativos y organizativos en seleiciones de naciones ensin estáu del mundu y a abrir l'alderique sobre qué modelu deportivu precisa'l nuesu país y cómo reivindicalu ensin escaecer los equipos femeninos". Pa ello, amás d'integrantes de La Llegra, va participar na charra Miguel Fernandi 'Burilo', comentarista deportivu en RPA.

La esperiencia d'Astur Hinches

La cita va ser esta tarde, a les 19 hores, nel Llar La Llegra (El Postigu Baxu 40, Uviéu). Nella tamién habrá güecu pa sentir cachos de les restresmisiones de los partíos por Radio Sele y pa recordar la esperiencia d'Astur Hinches, amás de pal repartu d'una serie de chaquetes estilu 'Seleición asturiana' diseñaes por La Llegra.

Contador Estadistiques