La seleición gallega UEFA impide'l pase a la final a cuatro a Asturies

Un remate de Félix Rial a una falta llateral mal defendida pol combináu asturianu nel minutu 37 clasifica a l'actual campeona continental.

Asturies nun supo aprovechar el factor campu y cayó eliminada esta tarde nel Nuevu Nalón con Galicia (0-1) na fase intermedia de la Copa de Rexones UEFA, que da pasu a la final a cuatro. Acompañen al país vecín Castilla-La Mancha, que ganó en Cantabria 1-3, y Aragón, que superó por 2-1 a la Comunidad de Madrid, mentes que ta xugándose l'Andalucía-La Rioja.

Nun choque mui igualáu, l'equipu visitante sacó petroleu d'una falta llateral llonxana énte una indecisión de la defensa. El centru de Cotilla al corazón del área rematólu Félix Rial, xugador del Alondras, a gol con tola ventaya.

Nun foi un partíu de munches ocasiones. Asturies tendría la más clara na segunda metá, nuna estilosa asistencia de René a Sergio que'l porteru gallegu sacaba col pie cuando'l Nuevu Nalón yá cantaba gol.

Los homes de Clemente Sánchez intentáronlo hasta'l final, ensin aciertu, polo que'l marcador finalmente nun se movió. D'esta forma fina l'aventura asturiana na Copa de Rexones UEFA, na que va tornar a competir na temporada 2025-2026, yá que la siguiente tien llugar la fase continental, de la que precisamente ye Galicia actual campeón.

Accidente mortal nel corredor d'El Nalón

Un tráxicu accidente nel corredor d'El Nalón que provocó la muerte de dos persones, una madre y el so fíu, llevó a retrasar l'entamu del choque 30 minutos. El corte obligáu de tráficu impidió la llegada del autocar de Galicia a tiempu.

Na imaxe, momentu nel que Félix Rial remata adelantándose a tola defensa asturiana.