La Selección d'Asturies xuega'l 28

Anque la Federación Asturiana de Futbol se desmarcare de la organización del partíu de la Selección Absoluta de Fútbol, tal y como adelantáremos n'Asturies.com, la Dirección de Deportes del Principáu decidió a la fin arrecostinar ella sola, xunta l'Ayuntamientu d'Avilés cola organización del acontecimientu.

L'organismu que dirixe Daniel Gutiérrez Granda y los responsables de deportes del conceyu avilesín presentaron ayeri en rueda de prensa lo que va ser el tercer partíu de la era "moderna" de la selección asturiana, que va facese'l d'ia 28 nel estadiu Román Suárez Puerta d'Avilés. El campu onde xuega l'Avilés Industrial de 2ªB va recibir pa la ocasión grades suplementaries col oxetu de llegar a los 10.000 asientos, lo que supón cásique doblar l'aforu del estadiu, polo demás de los más modernos d'Asturies.

Novoa repite por tercer ocasión nel cargu de mister d'una selección que ye fácil que presente una novedá importante col defensa del Alavés Abelardo. "El pitu", que perdió los otros dos partíos, yá dixo que-y prestaría abondo xugar cola selección, y anunció que nun contaba con perder el partíu d'esti añu. El porteru del Atlético de Madrid Esteban o el futbolista del Valencia Angulo son otres dos de les presencies d'equipos de fuera del país cásique segures pal día 28. La casa asturiana de ropa deportivo Joluvi repite tamién esti añu apurriendo la equipación oficial.

Lo único que queda por amarrar ye'l rival. Depués de qu'Arxelia vendiere l'añu pasáu a la organización, obligando a traer a Llituania nel últimu momentu, esti añu, la Dirección de Deportes quixo asegurar que diben tener un rival decente que poner en campu, colo que apalabraron coles federaciones de Bolivia y con Honduras. Casu de fallar lo bolivianos, qu'ocupen el puestu 91 na llista de selecciones de la FIFA, el repuestu tendría entovía más nivel en cuantes que los hondureños tan nel puestu 42. d'esa mesma llista.