La selección asturiana de fútbol nun va xugar esti añu

El Director Xeneral de Deportes del Principáu, Daniel Gutiérrez Granda, dio anuncia ayeri na Cadena Ser de que lo más seguro ye qu'esti añu nun se faiga'l yá tradicional partíu de navidá de la Selección Asturiana Absoluta de fútbol. Granda reconoció que tres l'ésitu del primer añu, el partíu foi decayendo n'aceptación hasta llegar a les perdes que rexistró'l partíu n'Avilés l'añu pasáu.

Ello ye que'l partíu de la Selección Asturiana, que'l primer añu (Asturies - Macedonia del 2000) dexó perres abondes que se repartieron ente los equipos de fútbol base, convirtióse nes dos ediciones que vinieron dempués nun gastu enorme. Nel 2.001, la espantada de la selección arxelina, qu'obligó a un apañu nel últimu momentu con Llituania, pero l'agua que cayó en Xixón aquel día acabó de ciguar el partíu, que dexó un mísere beneficiu. L'añu pasáu, la Federación Asturiana de Fútbol desmarcóse del proyectu atechándose en qu'esti partíu pa ellos tenía una función de recaudar perres pal fútbol base y que naide-yos garantizaba un ingresu mínimu. La Dirección de Deportes sacó alantre'l partíu ella sola y aquella vegada, anque Asturies machacó a Honduras nel estadiu Suárez Puerta, la impresión xeneral foi que si nun se-y daba un reblagu al partíu la cosa diba morrer ello solo pola falta del sofitu del públicu.

Si se quería qu'el partíu d'Asturies toviere un mínimu de ganchu pal públicu precisábase d'un rival de más categoría que los que llevaben desfilando estos tres años, y ello implicaba un gastu mayor. Si esi pasu de contratar meyores equipos va dase o non nun vamos sabelo polo menos hasta'l 2.004, que sedrá cuando Deportes vuelva a plantegase'l tema de la selección de fútbol. De momentu, pa esti 2.003, Deportes quier da-yos más protagonismu a otres especialidaes, y asina anunció Gutiérrez Granda, que dixo que pa estes navidaes el departamentu que dirixe enfótase nel partíu de la Selección de Balonmano.