La Seguridá Social entama a tramitar l’Ingresu Mínimu Vital

|
José Luis Escrivá

Yá ye posible solicitar l’Ingresu Mínimu Vital, midida afitada pol Gobiernu estatal pa rebaxar el nivel de probeza y esclusión, agraváu pola crisis sanitaria pola COVID-19, a la que van poder acceder les persones que tean n’estáu de vulnerabilidá económica. El trámite faise al traviés de la Sede Electrónica de la Seguridá Social.

Los dos partíos nel Executivu, PSOE y Xuníes Podemos, algamaron el miércoles el preste de tol Congresu, incluyíes formaciones que nun primer momentu criticaron la propuesta, y namái VOX salióse del consensu optando pola astención. D’esta forma créase una ferramienta que busca cubrir les necesidaes básiques d'unos 850.000 llares, según los datos que manexa'l Gobiernu, y que se pue solicitar dende güei.

“Configúrase como derechu suxetivu a una prestación económica, que forma parte de l’aición proteutora de la Seguridaá Social, y garantiza un nivel mínimu de renta a los que tean en situación de vulnerabilidá económica. Persigue garantizar una meyora real d’oportunidaes d’inclusión social y llaboral de les persones beneficiaries”, esplica’l Ministeriu d’Inclusión, Seguridá Social y Migraciones. Les persones que cumplan colos requisitos p’acceder al Ingresu Mínimu Vital van recibir 461 euros, cantidá que podría ampliase hasta los 1.100 euros mensuales según la cantidá de miembros de la unidá familiar.

Salariu Social Básicu

Esta prestación nueva ye mui asemeyada nos sos destinatarios y dinámica al Salariu Social Básicu, creáu pol Gobiernu d’Asturies nel 2005, que n’Asturies reciben anguaño unos 22.300 llares, unes 45.000 persones. Pa munches d’elles, la llegada da del Ingresu Mínimu Vital va suponer una meyora na so situación, con un ingresu d’hasta 200 euros más mensuales.

La prestación estatal va permitir tamién un gastu menor al Executivu asturianu, que podría llegar hasta la metá. Munchos de los beneficiarios del Salariu Social Básicu pasen d’oficiu a cobrar l’Ingresu Mínimu Vital.

Na imaxe, el ministru José Luis Escrivá nel momentu de defender nel Congresu'l Real Decretu-ley pol que s'afita l'Ingresu Mínimo Vital.

Contador Estadistiques