“La RTPA tien la obligación de normalizar la llingua asturiana ensin fondos esternos”, insiste Palacios

Rafael Palacios, diputáu de Podemos, foi l’únicu qu’afondó na partida de promoción del asturianu na comparecencia informativa de la conseyera Berta Piñán pa presentar el so proyeutu de presupuestos. Ignacio Blanco (VOX) entrugó polos gastos en personal y Adrián Pumares (Foro) emponderó’l refuerciu de la Rede de Normalización Llingüística na so fixación de posición.

“Yá asumió que’l proyeutu presupuestariu ye pocu ambiciosu” principió Palacios en referencia a les pallabres previes de Piñán, qu’espresó qu’el “crecimientu moderáu” na promoción del asturianu y el gallego-asturiano quedaba compensáu pola política tresversal del Gobiernu en política llingüística, pa depués criticar el de Ciañu que “hai un continuismu importante nes cuentes qu’ayuda poco a la sobrevivencia del idioma”. “Pensamos que debería haber más inversión y más fondos”, añadió.

El diputáu, únicu qu’emplegó l’asturianu nes sos intervenciones, insistió na postura del so partíu contraria a que la RTPA tenga una partida específica de la Conseyería de Cultura, Política Llingüística y Turismu, que nes cuentes del 2021 pasen de 70.000 a 100.000 euros. “Nun quiero escaecer que l’ente públicu recibe 24 millones d’euros en financiación direuta al traviés de la Conseyería de Presidencia y que tán vulnerando l’estatutu de la propia televisión, la Llei d’Usu y l’Estatutu d’Autonomía, qu’establecen que los medios públicos tienen que ser una parte fundamental del procesu de normalización llingüística d’Asturies. Esto quier dicir que Política Llingüística tien que pagar 100.000 euros a RTPA porque con toles perres que recibe nun ye quien a cumplir colo que tien deber, que ye normalizar la llingua asturiana”, denunció.

La creación del Serviciu Asturianu de Doblaxe, pa trayer al nuesu idioma películes y series rodaes n’otres llingües, sí considera Palacios que podría ser motivu pa la robla d’un conveniu de collaboración ente Política Llingüística y RTPA. Pa finar, quixo felicitar al Gobiernu poles campañes institucionales “nes que s’utilizó con normalidá les llingües d’Asturies, les propies y el castellanu, que se fixo amás ensin un gastu significativamente mayor, colo que demostramos tamién que se pue normalizar la llingua asturiana ensin que nos cuesten munches más perres”.

Piñán respondió a Palacios n’asturianu apuntando que “creemos que ye fundamental, porque ye lo que siempre quiximos, la normalización, que quier dicir facer normal l’usu de la llingua asturiana en tolos aspeutos de la vida cotidiana y de la vida institucional”, ensin que l’idioma quede “nel requexu de les polítiques pal asturianu o de la lliteratura asturiana”. “Nun asocede de forma casual, sinón que ye una apuesta d’esti Gobiernu y d’esta conseyería en normalizar”, aseguró.

Oficialidá na normalidá nueva

El restu de representantes de los grupos parllamentarios nun interrogaron a Piñán na cuestión de la promoción del asturianu. Namái Blanco quixo resolver una dulda sobre l’aumentu del gastu en personal, que-y solventó Antón García, direutor xeneral de Política Llingüística.

Sí hebo menciones a la política llingüística na fixación de posiciones. Palacios afirmó que “nun pue ser que l’asturianu y el gallego-asturiano, como llingües propies d’Asturies, nun tengan el reconocimientu de la oficialidá pa formar parte del procesu de reconstrucción social y económicu. La nueva normalidá tien que trayer la oficialidá, porque volver al status anterior ye volver a un estáu d’anormalidá onde les llingües d’Asturies son les úniques del Estáu español que nun son oficiales”.

La socialista Noelia Macías, pela so parte, apuntó que “en política llingüística, amás de les partíes tradicionales, refuérciase la puesta en marcha d’una verdadera Rede de Normalización Llingüística, con una partida de 317.720 euros”, lo que considera que “reflexa’l compromisu del Gobiernu cola llingua, porque ye patrimoniu cultural de toos y toes y ye herencia de la nuesa historia”. Blanco instó a revisar la partida a la promoción del asturianu “n’exercicios próximos”, mentes que Pumares emponderó l’apuesta del Gobiernu por aumentar les partíes a los servicios de normalización llingüística –“dalgo mui relevante, porque munchos, desgraciadamente, taben vacies de conteníos y presupuestu”–, un pasu “fundamental” pa la política llingüística que xune a que na “Radiotelevión Pública del Principáu d’Asturies s’utilice, se protexa y se difunda la llingua asturiana”.