La RTPA podría mercar productos a Warner por dos millones d'euros

La XDLA denuncia que la operación comercial "nun va xenerar nengún beneficiu pal audiovisual asturianu".

Según la información que manexa'l coleutivu cívicu, l'alcuerdu ente RTPA y multinacional estauxunidense Warner Bros Entertainment, con un montante total de dos millones d'euros, ta pendiente del preste del Gobiernu. "Pa la Xunta pola Defensa de la Llingua Asturiana (XDLA) ye pergrave qu'esti alcuerdu salga alantre, porque supón consumir nun añu'l 10 por cientu del presupuestu que tien RTPA y va facelo en dalgo que nun va xenerar nengún beneficiu económicu nel nuestru territoriu. Son películes que se van emitir doblaes al castellanu con una sonorización yá fecha n'empreses de Madrid, polo que los xestores de la radiotelevisión pública vuelven incumplir la llexislación vixente y los mandaos de fortalecer el texíu audiovisual del país y fomentar l'usu del asturianu", llamenten.

L'alcuerdu comercial con Warner ta promovíu por Antonio Virgili, secretariu xeneral en funciones, lo que ye consideráu "grave" pol coleutivu, yá que "los partíos parllamentarios tán en negociaciones pa nomar un xestor nuevu", tomándose "un determín económicamente tan importante pa la cadena ensin que'l Conseyu d'Alministración de la radiotelevisión pública tea operativu". Amás, considera que "esta intención incapacita a la dirección actual de RTPA –incluyendo a Antonio Virgili y a Francisco Orejas– pa siguir nel cargu, porque l'alcuerdu contradiz, amás de lo que diz la Llei d'Usu y la mesma Llei de RTPA, l'espíritu del pactu d'investidura ente PSOE y IX, que diz que RTPA tien qu'aumentar los conteníos en llingua asturiana".

Tamién va "contra l'oxetivu del mesmu plan de dignificación del asturianu, aprobáu apocayá col consensu d'una parte importante del arcu parllamentariu y que, con unos términos menos esplícitos, vien a dicir lo mesmo. Volvemos insistir en que'l compromisu mínimu de cumplir cola llexislación tien que ser un motivu sine qua non pa dirixir RTPA. Pel momentu, tolos nomes que se punxeron enriba la mesa –y amás por formaciones qu'alcordaron facer medrar la presencia del idioma na cadena– nun cumplen con esti perfil".

Perres pa la producción propia y el doblaxe de dibuxos animaos

La XDLA entiende qu'esos dos millones d'euros podríen destinase "a la producción propia y al doblaxe de dibuxos animaos", esto ye, "a xenerar beneficiu nel territoriu". "Dase la casualidá de que, dexando de llau los westerns, el cine norteamericanu nun suel pasar del 2 por cientu d'audiencia en TPA, tando perbaxo de la media de la cadena. Mentanto, el (pocu) cine dobláu al asturianu perpasó esi porcentaxe. Amás, la última producción n'asturianu estrenada en TPA –'L'Alzada'–  llegó a doblar la media d'audiencia. Sicasí, poco parecen importa-y a Virgili y compaña estos datos. Los xestores actuales muestren día tres día la so falta de compromisu col audiovisual y cola cultura asturiana, igual que la so incapacidá pa crear unos medios públicos fuertes y apegaos al territoriu, unos medios de los que tolos asturianos nos sintamos arguyosos", fina la organización cívica.