La RPA va emitir dos especiales sobre’l Premiu al Meyor Cantar

Esti vienres va celebrase en Xixón la gala del VII Premiu al Meyor Cantar. Por esti motivu, RPA va emitir dos especiales nel que Xune Elipe va analizar la trayeutoria d’esti gallardón, amás de falar colos finalistes d’esti añu.

El primer programa va tener llugar na madrugada del miércoles al xueves, dende medianueche hasta la 1, y nél el cantante de Dixebra va dedicase a esplicar los motivos polos que se creó esti gallardón y la so finalidá, asina como la dinámica y funcionamientu del mesmu. Tamién va facer un repasu a los temes ganadores de les seis ediciones anteriores y a falar del Liet International, festival européu de la canción en llingües minoritaries nel qu’Asturies ta representada pol ganador del Premiu al Meyor Cantar y qu’esti añu va celebrase en Còrsica. Mentes, la segunda parte del especial va emitise, a la mesma hora, na madrugada del xueves al vienres, y va centráse na edición d’esti añu y nos sos finalistes: ACD, Aire, Fala non Caduca, La Tarrancha y Taranus. Asina, Elipe va comentar colos artistes los temes que van defender na Llaboral y la so trayeutoria.

Amás, nestos especiales va poder sentise per primer vegada la sintonía del Premiu al Meyor Cantar, compuesta a costafecha pa esta edición de los gallardones pol músicu y productor corverán Sergio Rodríguez. Ésta va incluyise nun discu esclusivu colos cantares ganadores de toles ediciones del premiu, que se repartirá de baldre ente tolos asistentes a la gala. Sonia Fidalgo y Naciu Varillas van ser los encargaos de presentar esti eventu que va principiar a les 20.30 hores y que, nun primer momentu, diba a emitise en direuto pela TPA. La cadena pública, pa esa hora del vienres, anuncia na so programación ‘TPA Noticias. Segunda Edición’.