La romería d'El Carmín apuesta pola sidra

La Pola Siero celebra les sos fiestes, que tienen el llunes la so gran xornada cola folixa en La Sobatiella, onde nun se va poder acceder con bébores alcohóliques de graduación alta.

El Carmen y El Carmín saca a la cai estos díes a toles poleses y polesos. La capital del conceyu programa actividaes y conciertos estos díes pa disfrutar d'unes xornaes de folixa a les que s'averen miles de persones procedentes d'otros puntos del país, sobre manera'l llunes.

Una asistencia alta qu'amenazaba con facer perder la esencia de la romería al tar cada vegada más implantáu'l nomáu 'botellón'. Por esti motivu, la Sociedá de Festexos de La Pola Siero apuesta con volver al orixe d'El Carmín y potenciar les meriendes nes que la sidra sía la protagonista prohibiendo l'accesu al prau con bébores alcohóliques de graduación alta o botelles con líquidos yá mezclaos asina como recipientes de plásticu.

Por contra, sí se podrá llevar, amás de botelles de sidra, vinu o cerveza, pa disfrutar d'una tarde agradable en La Sobatiella y depués siguir cola fiesta per La Pola, onde va tocar la orquesta Cuarta Calle y va pinchar el DJ Dani Vietes. Otra manera, güei va actuar el grupu Drugos (22.30 hores) nel parque Alfonso X na iniciativa 'Festipráu', mañana La Tarrancha (23 hores), amás de la orquesta Gotan (22 hores) na cai Alcalde Parrondo, y el domingu La Movida (22.30 hores).

Consulta equí'l programa completu de les fiestes.