La Rexenta enfrenta a Drácula na primer novela de Carbayales

Monstruos, sexu, aición, sangre, horror, humor y maxa. Ye lo que promete ‘La Rexenta contra Drácula’, la rompedora primer novela d’Adrián Carbayales, editada por Radagast, qu’enfrenta a dos personaxes a priori tan distintos como Ana Ozores y el conde transilvanu, y que l’autor presenta esti xueves n’Uviéu.

Na fantasía de Carbayales lo que se cuenta en ‘La Rexenta’ “foi una mentira del axente secretu Leopoldo Alas, nome en clave ‘Clarín’, espertu propagandista d’una asociación secreta p’atapar l’enfrentamientu ente l’axente secreta Ana Ozores, nome en clave ‘La Rexenta’, y Drácula, qu’intentó corromper a Vetusta na seronda de 1882”. D’esti puntu de partida naz una historia na qu’hai espaciu pa fiestes, orxíes y ritos, y munches referencies tanto a les dos obres clásiques como a les adautaciones al cine y otros títulos.

“Detrás de la filaza principal, Adrián Carbayales mete una doble llectura y diz a les clares que nesta novela nun se va atopar namás l'enfrentamientu físicu ente los dos clásicos lliterarios sinón tamién l'alegóricu ente dos maneres d'entender la lliteratura: ¿Tien que ser la lliteratura una referencia culta o buscar el favor del gran públicu? ¿Hai que siguir apostando polo rural o hai que facelo pola fantasía y la ciencia ficción? ¿Ye’l momentu d’acabar colos ritmos lentos y posaos y puxar por narratives más frenétiques?”, apunten dende Radagast.

Con una bona respuesta del públicu, hasta convertise nel más vendíu nel puestu de la editorial na Feria del Libro de Xixón o tener que reponese hasta en dos ocasiones na uvieína Librería Cervantes nes dos selmanes que lleva a la venta, ‘La Rexenta contra Drácula’ va presentase esta tarde a les 19 hores nel llocal del Gremiu d’Editores d’Asturies y Pintar-pintar, na plaza Xuan XXIII d’Uviéu.