La revista Idiófonos asoleya la segunda parte del so estudiu sobre’l Pericote de Llanes

La revista dixital "Idiófonos" qu'asoleya'l "Gabinete d'Estudios Etnográficos, presenta la segunda parte del estudiu nel que los musicólogos y etnógrafos Fernando M. de la Puente Hevia y Mª Isabel Álvarez Álvarez afonden nel aniciu del pericote, el baile llaniscu por escelencia.

Si na primer parte del estudiu, Puente Hevia y Álvarez acudíen a fontes documentales escrites y cróniques del sieglu XIX que demostraben como se baillaba'l pericote en Llanes y n'otros llugares del oriente asturianu y incluso en tierra de Cantabria, conseñando toles variantes estilístiques que presentaben ente los distintos pericotes, nesta segunda parte del estudiu los musicólogos estremen como'l pericote orixinal, del que poco se conoz, acabó convirtiéndose nel pericote arquetípicu que se conoz anguaño. Pa los autores del estudiu, que yá esplicaben anteriormente que'l Pericote ye "una reproducción de movimientos y desplazamientos cara a un públicu que nun participa del eventu más que como observadores" queda claro que'l pericote llaniscu d'anguaño ye una danza tradicional "dirixida" que parte de la posible adaptación de bailles tradicionales "populares". Los escritos qu'a mediaos del sieglu XX fexo l'estudiosu Emilio Pola conviértense en fonte documental pa esti estudiu que los autores prometen qu'entovía va tener más continuaciones.
Más información na revista "Idiófonos"