La revista "El Cuirno" abre'l plazu pa collaboraciones

El Grupu de Baille Tradicional San Félix de Candás ta preparando yá la segunda edición del "Alcuentru Atlánticu" que va facese en Candás (Carreño) del 24 al 27 d'agostu de 2006. Coincidiendo con ello, l'asociación va espublizar el segundu númberu de la so revista cultural y lliteraria "El Cuirno" centrada en temes culturales, históricos y divulgativos sobre Candás y la contornada del Cabu Peñes, anque abierta tamién a collaboraciones lliteraries. Pa ello, los responsables de la revista tienen abiertu plazu hasta'l 1 de mayu pa que se-yos unvien collaboraciones, que puen mandase a esti corréu electrónicu.

El primer númberu d'esta revista, que s'asoleyó l'añu pasáu ,contaba con collaboraciones de Xulio Viejo sobre Antón de Marirreguera, Alberto Álvarez Peña (Lleendes de Culiebres en Conceyu Carreño), Armando Rodríguez (la bandera del Reximientu de Candás y Lluanco) o Pedro Busto, que recuperó los trabayos del illustráu del llugar Carlos Benito González de Posada, ente otros.