La revista Cultures enfrenta ciencies empíriques y teoríes sociolóxiques na xeografía d’angüaño

Nestos díes llega a les llibreríes d’Asturies el númberu 25 de Cultures. Revista Asturiana de Cultura, qu’edita la Academia de la Llingua Asturiana. "La exa monográfica del volume preséntase como un analís coral, multidisciplinar dende les ciencies sociales, onde la reflexón antropolóxica encóntase en miraes téuniques y académiques proyeutaes dende la xeografía y la economía", en pallabres de l’Academia.

El monográficu “La cultura asturiana, na encruciyada” dedica les sos primeres fueyes al artículu “Cambiu, crisis y recambiu: la sociedá rural asturiana, ente la traxedia y la esperanza”, firmáu pol exprofesor d’economía, David M. Rivas. Roberto González-Quevedo, entrevista a José Feito, que fala de “Sincretismu perversu ya síntesis adautativa eficiente: dous conceutos pa entender l’escenariu asturianu de desarrollu rural”. Pel so llau, el xeógrafu Xosé Nel Riesgo analiza una parte de la so trayeutoria profesional en “Acabación de la memoria del paisax asturianu”. Xosé Alba, tamién profesor d’economía, contribúi a esti númberu 25 de Cultures con “Área Metropolitana Central d’Asturies: la ciudadona que nos tien de poner nel mapa”. Zarra’l bloque monográficu’l propiu direutor de la revista, Roberto González-Quevedo con “Los campesinos y el destín de la cultura asturiana: de la familia tradicional al futuru inseguru”. Dos faces más completen esti númberu. Na etnográfica, Alberto Álvarez Peña escribe de “Cuentos maraviyosos y d’encantamientos”. L’antropóloga Yolanda Cerra y l’historiador Xuan F. Bas faen homenaxe y estudien a l’autora de la primer obra antropolóxica asturiana, Purificación Viyao Valdés, que vivió ente 1892 y 1934.

Cultures. Revista Asturiana de Cultura espublízase añalmente dende l’añu 1990, amosando trabayos qu’investiguen aspeutos de la cultura asturiana, n’especial los venceyaos a la etnografía y l'antropoloxía d’esta comunidá. El númberu anterior tuvo dedicáu a lleendes y ayalgues.

Na semeya, el númberu 24 d'esta coleición