La representante bretona Lleuwen ganó’l Liet International de Xixón

El Liet International de Xixón viaxó pa Breizh. La cantante Lleuwen resultó ganadora del primer certame del festival européu de la canción celebráu n’Asturies pol cantar ‘Ar Gouloù Bev’. L’Asturiana Mining Company llevóse’l premiu del públicu.

Asturies dexó una bona imaxe ente les diez delegaciones desplazaes a Xixón pola so organización y pola respuesta del públicu, que nun dexó de reivindicar la oficialidá del idioma nun eventu televisáu en direutu pa Fryslân, Friûl y Còrsica. Los once artistes y bandes participantes nel Liet International amosaron un bon nivel musical, anque’l premiu foi pa la representante bretona –anque nacida en Cymru– por un resultáu más qu’axustáu, yá que sumó namái un puntu más que los corsos Dopu Cena: 87 por 86. El tercer clasificáu foron los baxo saxones The Voodooeletric, con 76 puntos, mentes que l’Asturiana Mining Company finó cuarta, con 66. Sicasí, ‘Si nun conoces Vaḷḷouta’ foi la favoríta del votu del públicu, resultante de sumar el fechu polos presentes nel teatru de la Llaboral colos de los internautes al traviés de la web del festival.

Dixebra, grupu qu’abrió la participación de bandes asturianes nel 2008 nesti festival européu de la canción en llingües minorizaes con orixe en Fryslân, encargóse de poner en pie al públicu mientres el discutiniu del xuráu, dando un ambiente festivu al certame. Esti momentu del conciertu tamién foi onde mayor ecu tuvo la reivindicación llingüística. Ana González, conseyera d’Educación, Cultura y Deporte, y Ana Fueyo, direutora xeneral de Política Llingüística, representaron a l’alministración asturiana nel Liet, que l’añu qu’entra va celebrase en Còrsica.

Asturies, campeona de la Copa Cantábrica de Liriu

El sábadu pela mañana, de manera paralela al Liet International, tuvo llugar nel patiu de la Llaboral la V Copa Cantábrica de Liriu, competición qu’enfrenta a la seleición asturiana cola gallega de billarda. El trunfu quedó en casa pol resultáu de 30-28, polo qu’Asturies recorta a Galicia nel global d’esti tornéu: dos títulos asturianos por trés gallegos.