La repetición eleutoral nun soluciona nada

El PSOE ganó les eleiciones, pero la gobernabilidá ye entá más complicada.

L'apuesta nun-y salió bien a los socialistes, que rexistraron peores resultaos. Col 99,97 por cientu del votu escrutáu, pierde 3 diputaos (queda con 120) y baxa'l porcentaxe d'apoyos del 28,67 por cientu al 28.

Los resultaos daos dificulten más la posibilidá de formar gobiernu, cola necesidá d'alcuerdos pa que Pedro Sánchez pueda salir investíu. Amás trai la nota negativa del ascensu de la ultraderecha, al pasar VOX de 24 a 52 diputaos.

El gran perxudicáu de la xornada foi Ciudadanos, que pierde 47 escaños pa quedar con 10. El PP, mentes, recupera y algama 87, 21 más que n'abril.

Xuníes Podemos y les so confluncies queden con 35 (42) y Más País-EQUO entra nel Congresu con 3. Nun va ser l'únicu partíu que se va estrenar, yá que Teruel Existe algamó un diputáu y les CUP sumaron 2, mentes que'l BNG torna a tener representación, al igual que Foro.

El restu de fuercies que van tar na Cámara Baxa son ERC-Sobiranistes, con 13 (15 n'abril); Junts per Catalunya-Junts, con 8 (7); EAJ-PNV, con 7 (6); EH Bildu, con 5 (4); Nueva Canarias-Coalición Canaria, con 2 (2); Navarra Suma, con 2 (2); y PRC, con 1 (1).

Senáu

La perda de representación del PSOE nel Senáu ye entá mayor, al pasar de 123 a 94 col 93,10 por cientu del votu escrutáu. El PP ye'l gran beneficiáu, rexistrando 81 polos 54 d'abril.