La renta per cápita de los habitantes del Estáu, siete puntos perbaxo de la media de la Eurozona

|

Los efeutos de la crisis nel Estáu español fixeron que la renta per cápita sía siete puntos menor que la media de los países de la Eurozona y un puntu más que la media comunitaria. Estos datos d’Eurostat correspuenden al 2010.
 
El Productu Interior Brutu (PIB) por habitante cayó nel Estáu del 103 por cientu de la media de la Xunión Europea (XE) nel 2009 al 101 por cientu del añu pasáu. Dende l’entamu de la crisis, nel 2007, la renta per cápita acumula una cayida de cuatro puntos sobre'l promediu comunitariu, mentes que la media de los ciudadanos de la Eurozona baxo namái un puntu: d’un 109 por cientu a un 108 por cientu.
 
El país de la XE que más riqueza por habitante perdió mentes la crisis ye Irlanda, que pasó del 147 por cientu del 2007 al 125 por cientu del 2010, lo que nun quita pa que sía’l tercer país de la llista empatáu con Dinamarca, namái superaos por Luxemburgu (283 por cientu) y Holanda (134 por cientu). Per delantre del Estáu español tán Austria (125 por cientu), Suecia (123 por cientu), Alemaña, Bélxica (118 por cientu), Finlandia (116 por cientu), Reinu Xuníu (113 por cientu) y Francia (107 por cientu).
 
Por contra, los estaos con menor riqueza per cápita son Bulgaria (43 por cientu), Rumanía (45 por cientu) y Letonia (52 por cientu).

Contador Estadistiques