'La reina la guapura de Leenane', segunda obra finalista del V Nel Amaro

|
'La reina la guapura de Leenane' de Nun Tris

La obra del irlandés Martin McDonagh, llevada al asturianu por Antón Caamaño, va ponela n'escena Nun Tris. Factoría Norte representa en La Felguera 'Les rellaciones peligroses'.

Ye día de teatru n'asturianu güei n'Asturies. L'uveín Teatru Filarmónica acueye a les 20 hores, con entrada llibre hasta completar aforu, la defensa sobre les tables de 'La reina la guapura de Leenane', segunda obra finalista del V Premiu y Festival Nel Amaro de Teatru Profesional en Llingua Asturiana o Gallego-asturiano.

Esta obra ye un drama sobre la soledá, la sinceridá y les rellaciones ente les persones y la familia, "qu'amuesa como munches veces repitimos los errores y fracasos de los que vinieron primero que nós". Nel Éire rural de los años 80, contestu de violencia y crisis idiomática y identitaria, Maureen, la protagonista, caltién una rellación percomplicada cola madre.

Ella tien 40 años y ye virxe; la madre, Mag, ye práuticamente una inválida, anque, según la fía, desaxera los sos problemes. Una cenciella invitación pa dir a una fiesta camudará'l destín de dambes.

Izar Gayo (Maureen Folan), lnma Rodríguez (Mag Folan), Diego Lombardía (Ray Dooley) y Carlos Alba (Pato Dooley) conformen el repartu d'esta obra dirixida pol propiu Caamaño. Estrenada nel 1996, representóse pelos circuitos teatrales más importantes de Londres y New York, y cuenta tamién con versiones en gallego, catalán y castellanu.

El Nel Amaro, na so fase de festival, va siguir el viernes viniente con ‘Les piripiripirates con parches y a lo xole’, de Factoría Norte; y el el día 22 con 'Setiembre', de José Rico Arte Producciones.

Autores nel Camín

Tamién va haber artes escéniques en La Felguera, nel Teatru Nuevu a les 20.15 hores, nesti casu dientro de la programación del ciclu Autores nel Camín, con entrada llibre. Factoría Norte va representar 'Les rellaciones peligroses', obra ganadora del III Premiu y Festival Nel Amaro de Teatru Profesional en Llingua Asturiana o Gallego-asturiano, correspondiente al añu 2019.

Mentes, esti meudía, Emma Méndez va celebrar una alcuentru con llectores sobre la so obra 'Os secretos del molín veyo' na Casa Cultura d'A Veiga, tamién dientro d'esti programa de la Conseyería de Cultura, Política Llingüística y Turismu.

 

Contador Estadistiques