‘La Regenta’ de Clarín yá tien torna al asturianu

|
Leopoldo Alas 'Clarín'

Una de les noveles más destacaes del sieglu XIX, ‘La Regenta’, súmase a la llista de clásicos de la lliteratura castellana y universal que se pueden n'asturianu. Víctor Suárez ye’l responsable de la torna, que se va presentar esti miércoles nel Campoamor nun actu nel que va tar presente l’alcalde d’Uviéu.

Escrita nel 1884 por Leopoldo Alas ‘Clarín’ en dos tomos, tien como argumentu central l’adulteriu nuna pequeña ciudá de ‘provincies’, Vetusta, basada nel Uviéu del so tiempu. Una novela, considerada la meyor en castellanu del sieglu XIX, que resultó un escándalu nel so tiempu.

“Ana Ozores, la protagonista que da nome a la obra, ye una moza guapa, soñadora y aburrida, casada con Víctor Quintanar, ex rexente, bonaz y vieyu. A Ana preténdenla dos figures centrales de Vetusta: Álvaro Mesía, un mediocre don Xuan local, y Fermín de Pas, el Maxistral de la catedral, un ambiciosu y complexu personaxe. La novela tien nel retratu coral de Vetusta y na descripción moral de la ciudá los elementos que la fain la pieza maestra de la narrativa realista”, resumen dende Saltadera, editora de la torna.

La presentación de ‘La Rexenta’ va tener llugar mañana, a les 19 hores, nel Salón de Té del Teatru Campoamor, actu nel que van tar presente xunto a Suárez l’alcalde d’Uviéu, Francisco Wenceslao López Martínez; Roberto Sánches Ramoz ‘Rivi’, conceyal de Cultura; y la periodista Pilar Rubiera. El responsable de la torna, maestru d'asturianu, escritor en revistes como ‘Formientu’ y ‘Lliteratura’, y alministrador de la Wikipedia n’asturianu, destaca que la traducción de ‘La Regenta’ faise dende l'almiración a la novela y n'homenaxe al autor.

“Con esta cuidada traducción pretendemos rindir un homenaxe, dende l'asturianu y el desarrollu cultural que llogró nes últimes décades, a quien ye maestru indiscutible de los narradores nuna y n'otra llingua d’Asturies”, afirmen dende la editorial, que recuerda que Clarín foi un “ferviente defensor del bable festivu no lliterario”, enfrentando “lo qu'él consideraba l'asturianu ‘realista’ de Tiadoro Cuesta o Pepín Quevedo a lo que él llamó ‘los prosistas del bable estático’”.

Contador Estadistiques