La reforma l'estatutu, a Conceyu Abiertu

El presidente del Principáu, Vicente Álvarez Areces, declaró ayeri la disposición del executivu autonómicu pa diseñar una reforma del estatutu d'autonomía "de consensu político y enxerta na Constitución". El presidente asturianu faló de facer una reforma estatutaria con "visión de serviciu a los ciudadanos" y "de consensu" na visita a Asturies del ministru d'Alministraciones Públiques, Jordi Sevilla, col que faló mayormente sobre'l trespasu de les competencies de xusticia. Mientres, el Partíu Popular yá fala d'una reforma de "máximos" y hasta fuerces como'l Bloque por Asturies yá faen propuestes propies de cambeos a enxertar na redacción del testu autonómicu.

Nesti procesu de prerreforma, la oficialidá del asturianu apaez como un horizonte que yá munchos planteguen como real, y asina lo entiende, por poner un casu, la Xunta Pola Defensa de la Llingua, que va entamar una plataforma abierta col únicu oxetivu de meter la oficialidá na reforma estatutaria. Ye por ello qu'en conceyu abiertu queremos consultar la opinión de los nuestros llectores ¿Va cayer la oficialidá d'ésta?