La reforma les pensiones,"en llinia" coles propuestes del Gobiernu

La vicepresidenta económica del Gobiernu, Elena Salgado, aseguró que la reforma de les pensiones que'l Gobiernu va aprobar el 28 de xineru va dir "en llinia" colos planteamientos del Executivu.

Tamién aseguró que va "intensificar los esfuerzos de negociación" colos sindicatos una vez que'l Pactu de Toledo emita'l so informe, lo que podría asoceder ente esta selmana y la próxima.
  
Precisamente, el PSOE fizo esti miércoles una propuesta a la Comisión del Pactu de Toledo, reunida esti miércoles nel Congresu de los Diputaos p'averar la edá real de xubilación a la llegal, pero sin citar espresamente los 67 años a los que'l Gobiernu plantegó retrasar la edá llegal de xubilación pa poder caltener el sistema de la Seguridá Social.
  
En rueda prensa nel Congresu, Salgado aseguró que "namás cabe respetu" ante les movilizaciones anunciaes polos sindicatos precisamente por esta reforma, que podríen acabar nuna nueva convocatoria de güelga xeneral si s'aprueba sin consensu.
  
Sicasí, calcó en que la güelga del pasáu 29 de setiembre nun tuvo "efectos significativos sobre la economía", más allá del so impactu na producción industrial.
  
En tou casu, señaló que ye'l Ministeriu de Trabayu y Inmigración el que lidera los contactos colos axentes sociales, que tamién tienen como oxetu'l desarrollu de la reforma llaboral y la modernización de la negociación colectiva, un asuntu que, según alvirtió, tendrá que ser "prioritariu dende'l primer momentu" pal futuru nuevu presidente de la CEOE.