“La reforma del Estatutu ye plenamente compatible cola dinamización de la economía”, asegura Barbón

La dinamización de la economía ye “la gran prioridá” del Gobiernu una vez que se controle la pandemia y “la reforma del Estatutu ye plenamente compatible”, apuntó’l presidente Adrián Barbón na respuesta a una entruga de Ciudadanos. La vocera Susana Fernández Álvarez tornó a sacar el tema de la cooficialidá, insistió cola so postura sobre la normalización y negó-y al asturianu la categoría de llingua.

“¿Dada la priesa qu’amuesa por reformar l’Estatutu, qué asuntos son los que pretende introducir nel alderique tan urxentes y determinantes pa la recuperación d’Asturies?”, cuestionó la formación naranxa, qu’hai 15 díes, nel Plenu últimu na Xunta Xeneral, preguntara al socialista sobre la “oficialidá amable”. Una intervención que dexó asuntos que Fernández Álvarez quixo tornar a sacar esta mañana.

“Señora Fernández, sí tengo priesa, tola del mundu, y sabe por qué: porque a min me gusta cumplir col programa de gobiernu col que nos presentamos a les eleiciones y naquel programa falábamos de la reforma del Estatutu d’Autonomía”, entamó nun primer momentu Barbón, que recordó que dicha reforma aplazárala “hasta que tuviera encalzada la cuestión sanitaria”, esto ye, “cuando lleguemos a la inmunidá grupal, al rodiu del 70 o 80 por cientu de vacunaos”. Llueu criticó que la vocera de Ciudadanos falara de la reforma “como si se contrapunxera a la dinamización económica”, apuntando darréu que “ún de los elementos fundamentales ye la reforma del Estututu”, pa finalmente asegurar que “la reforma del Estatutu ye plenamente compatible cola dinamización de la nuesa economía”.

Na réplica, Fernández Álvarez afirmó que “nós tamos d’alcuerdu en qu’hai que reformalu, pero nun creemos qu’agora sía’l momentu” –declaración que sorprendió sobre manera a Barbón– y recordó como propuestes del so partíu “el desaforamientu de los miembros del Gobiernu y del Parllamentu, y la limitación del mandatu presidencial a 8 años”. Tornó a plantegar la convocatoria d’una consunta ciudadana sobre la cooficialidá, “non un referéndum”, y trató de correxir dalgunes de les afirmaciones que fixo hai 15 díes, como les referencies a los socialistes y los dirixentes anteriores de la FSA.

Tamién quixo volver a sacar el tema de la normalización, “que nos llevaría a un emprobecimientu llingüísticu”, citando a Jesús Neira y asegurando que “estos díes pudi comprobar de primer mano” que hai “llingüistes y estudiosos del asturianu que compartíen esa idea que tenemos de que la normalización fai perder una pluralidá importante, lo que pasa ye que esos llingüistes nun s’atreven a dicilo públicamente, con nomes y apellíos, porque llueu-yos pasa factura”. “Y polo que tamién s’escandalicen esos llingüistes ye cuando-y sienten comparar un ‘habla’ que se fala minoritariamente nun territoriu con llingües como’l catalán o’l gallegu que se falen mayoritariamente nos sos territorios”, añadió

Los trés grandes retos

“Contradizse”, principió Barbón, recordando-y depués que “la reforma del Estatutu, pola tramitación parllamentaria que conlleva, o se fai agora o nun progresa nesta llexislatura”. “Digámoslo claro, lo que vusté ta en contra ye la reforma del Estatutu nesta llexislatura, dígalo abiertamente”, pidió-y.

Sobre la consulta ciudadana, el presidente apuntó “que’l Gobiernu d’Asturies nun tien competencies llegales pa facer esi tipu de convocatories”. Llueu recordó los 20 diputaos qu’algamó nes eleiciones pa torgar esa supuesta oposición del socialismu a la oficialidá y recriminó-y que punxera en dulda que l’asturianu sía una llingua: “equí l’únicu negacionista yera’l señor Blanco”, ironizó.

“Hai qu’actualizar determinaos aspeutos” del Estatutu, siguió, “y hai que facelo ensin nengun tipu de dramatismu”. “La dinamización económica, pa nós, una vez controlada la situación sanitaria, va ser la nuesa gran prioridá del restu de la llexislatura. Díxilo enantes: creación d’emplegu superada la pandemia, ciencia y innovación pa tresformar la nuesa industrian y retu demográficu. Son los nuesos trés grandes retos”, resumió.