La rede de fibra óptica va llegar a 2.040 viviendes más de 16 poblaciones

La rede ‘Asturcón’ de fibra óptica sigue estendiéndose pel país pa facilitar l’accesu a Internet de los asturianos. 2.040 viviendes de 16 poblaciones onde yá había instalación, amás dos polígonos industriales, son los beneficiarios d’esta ampliación.

Nava, La Pola Llaviana, L'Entregu, Sotrondio, Blimea, La Pola Ḷḷena, Cangas del Narcea, Navia, Veiga, Morea, Turón, Ḷḷuarca, L’Infiestu, Tapia, Llanes y A Veiga son les poblaciones onde van entamase los trabayos, a los que la Conseyería d’Emplegu, Industria y Turismu destina 355.000 euros. D’igual forma, van invertise 102.000 euros pa que les empreses de los polígonos industriales d’Almuña (Valdés) y Barres (Castropol) puedan tamién disponer d'una conexón de banda ancha per aciu la fibra óptica.

Xestión d'Infraestructures Públiques de Telecomunicaciones del Principáu (Xitpa), que s’encarga de la obra, entamó tamién col estudiu económicu que va permitir estender la rede próximamente a trés poblaciones a lo llargo d’esti añu: L’Espín (Cuaña), Coḷḷanzo (Ayer) y El Cruceru (Tinéu). A lo último, la empresa pública ta trabayando nel proyeutu d'actualización y renovación de parte de la rede de fibra p'aumentar progresivamente la velocidá d'accesu a Internet, de los 100 Mbps (megabits por segundu) simétricos máximos de l'actualidá hasta algamar conexones de 500 Mbps o inclusive de 1 Gbps (gigabits per segundu).