La recuperación del Antroxu tradicional d'Avilés, a alderique

La Vieya y El Cornelu van acudir a una cita que quier ser la base d'un proyeutu coleutivu de ciudá pa rescatar los mazcaritos tradicionales pa la fiesta, cola mente puesta nel 2023.

"¿Los carros y mazcaritos tradicionales han tar presentes nel Antroxu avilesín d'anguaño? ¿Hemos recuperar la quema o foguera de La Vieya como celebración de despidida del iviernu?" son les dos entrugues coles que va arrancar la mesa redonda 'El Antroxu tradicional de Avilés: pasado, presente y futuro', entamada polos Reyes del Goxu y la Faba 2022 col asesoramientu del Coleutivu Abillés Antroxu Tradicional. Los convidaos a participar son l'entógrafu Alberto Álvarez Peña; la recreadora y especialista n'indumentaria tradicional Raquel Vega, responsable del traxe d'El Cornelu; el téunicu de xestión cultural Rubén Arias; Sara Vega, de los Reyes del Goxu y la Faba; y Víctor Raúl Pintado 'Vitu', del Coleutivu Abillés Antroxu Tradicional.

La intención d'esti alderique ye recopilar les propuestes y idees d'intervinientes y públicu "de cara a entamar a trabayar nun proyeutu coleutivu de ciudá que permita estudiar distintes propuestes pa recuperar l'Antroxu tradicional avilesín". La vista ta puesta nel 2023, cola posibilidá de contar yá con dalgunos de los mazcaritos tradicionales qu'estes asociaciones tratan de recuperar al traviés de fontes hemerográficas y entrevistes a persones mayores del conceyu y la redolada, con La Vieya y El Cornelu como primeros resultaos.

La mesa redonda va celebrase esta tarde a les 19.30 hores nel salón d'actos del Palaciu Valdecarzana, con entrada llibre. Na mesma van tar presentes La Vieya y El Cornelu pa facer más prestosu entá l'eventu.

Na semeya, mázcara d'El Cornelu.