La reciella nagua por Los Bolechas pero la TPA nun programa temporaes nueves

La demanda ente la reciella y l'interés de la empresa editora de Los Bolechas nel doblaxe de temporaes nueves de la serie choquen cola falta d'enfotu por parte de la RTPA. Lo que sí llegará próximamente son llibros nuevos de los personaxes.

Los neños y neñes d'Asturies nun disfrutarán d'episodios nuevos de Los Bolechas; al menos de momentu. La RTPA nun tien intención de doblar la segunda temporada pese al interés de la empresa que produz la serie gallega, toda una sensación nel país vecín como amuesen les decenes de capítulos emitíos na TVG, el mediu millar de llibros espublizaos, la gran cantidá de productos pa neños protagonizaos polos personaxes o la participación d'éstos en campañes entamaes pola propia Xunta.

De momentu, la reciella ha de conformase cola reposición de la primer temporada, que l'ente públicu de comunicación tien previsto facer en feches próximes. Tamién pue disfrutar de los dos llibros de Los Bolechas espublizaos hasta'l momentu n'asturianu, 'Cómo ñacemos' y 'El cuerpu humanu', a los que se sumarán otros títulos próximamente por mor de los pidimientos continuos procedentes d'Asturies que lleguen a Galicia.

"Nun tenemos entovía nada zarrao, pero dada la cantidá de persones que nos lo soliciten, ye segura la espublización de más llibros n'asturianu de Los Bolechas", apunten a Asturies.com dende'l gabinete de comunicación de la empresa gallega.

Ésitu d'audiencia

La estrena de Los Bolechas na TPA algamó datos perriba de la media de la programación infantil en castellanu con cifres qu'aportaron al 7'2% de l'audiencia con 'La moñeca berrona', y en tolos casos alganmaron unes cifres d'audencia perriba tamién de la media de la cadena.