La realidá de la concertada pa cola materia de Llingua Asturiana

Si na escuela pública la información a los padres y madres sobre la matriculación na materia de Llingua Asturiana y Gallego-asturiano nun ye la más afayadiza, ésta agrávase enforma na concertada. Son munchos los centros qu'afalen de distintes formes a que los neños estudien 'Cultura Asturiana'.

Nesti momentu hai escueles concertaes n'Asturies nes que'l 100% de les families escueyen Cultura asturiana en cuenta de llingua pa los sos fíos y fíes. Dellos exemplos son el Codema de Xixón, colexu nel que nel cursu anterior de 615 escolinos y escolines nenguna famiilia optó por "llingua asturiana". Esti mesmu casu dase n'otros como el Virgen de la Reina o les Dominiques.

N'otros casos, como l'Inmaculada o l'Asunción en Xixón, les cifres de matriculación en llingua asturiana son simbóliques.

¿Cómo se consigue dende los centros disuadir a les families de qu'opten por una opción a la que tienen derechu según la llei?  Normalmente coméntase de pallabra o per escrito a les families la conveniencia d'escoyer cultura asturiana, n'abondos casos esplicando qu'esta asignatura tien ventayes como la utilización de nueves tecnoloxíes, metodoloxíes interesantes, o pol so calter complementariu con conocimientu del mediu o ciencies sociales.

Ún exemplu, non de los peores, ye'l de la nota unviada a les families pa la matriculación del cursu vinienente que se pue ver na imaxe. Trátase d'un colexu concertáu del centru del país na que nel área del bloque d'asignatures de llibre configuración autónomica faise una esplicación qu'incita ensin dulda a la escoyeta de 'Cultura Asturiana'. Asina, el testu apunta que "la 'Llingua Asturiana' consistirá -namás- nel enseñu de la mesma. Mientres que Na 'Cultura Asturiana' "estudiaránse aspeutos de la nuesa rexón en castellanu, utilizando delles metodoloxíes. Nesta área reforzaremos tamién tamién el conteníu de Ciencies Sociales".

Con esta redaición nun hai dulda de que 'Cultura Asturiana' paez una materia más completa que 'Llingua Asturiana', afalando a los padres y madres a escoyer la primera al tener suspuestamente más conteníu. Nesti puntu ye preciso recordar, que 'Cultura Asturiana' tien un currículu marcáu pola Conseyería d'Educación y Cultura, polo que los maestros nun deberíen salise del mesmu por decisión de la direición del centru, y tamién que l'asignatura de Llingua Asturiana tamién cubre aspectos de la cultura d'Asturies y ta rellacionada col área de conocimientu del mediu.

Ésti ye sólo un exemplu de los munchos que se dan n'Asturies en colexos concertaos y qu'espliquen la baxa o nula  matriculación en 'Llingua Asturiana y Lliteratura' nestes escueles. N'otros centros los responsables 'vienden' l'asignatura alternativa col usu de ferramientes informátiques nella y otros, direutamente, traten de convencer individualmente a les families si se'apunten a Llingua Asturiana col argumentu de que'l neñu o neña va tar solu en clase porque'l restu escueye 'Cultura Asturiana'.

Aparte del componente ideolóxicu, predominante en munchos casos, hai que sumar tamién l'económicu. 'Cultura Asturiana' suel tar impartida por maestros del centru ensin formación nin preparación específica, mentes que pa dar 'Llingua Asturiana y Lliteratura' ye necesaria la titulación requerida, polo que tienen que facese contrataciones si nun hai nengún profesor/a na plantía que tenga la titulación.

En cualquier casu, anque esta ye una situación xeneralizada, que supón un fraude de llei y que conculca los derechos de families y escolinos y escolines, hai delles escepciones como la del colexu concertáu San Lorenzo en Xixón, nel que les cifres de matriculación en Llingua Asturiana superen a les de Cultura Asturiana.