La quema de basura en cementeres

La otra selmana saltaba la noticia de que'l galipote que se recuperare del Prestige diba quemar nos fornos de la fábrica de cementu d'Aboño, una midida abondo criticada en cuantes que los tósicos que llevaba'l galipote podíen acabar espardiéndose pel aire. El casu ye que práctiques como esta nun son nueves. Yá va tiempu que delles alministraciones lleven a quemar residuos pa los que nun hai una política de recuperación fecha o posible y que, por cantidá o pol peligru que tienen, faense desapaecer nun fornu. El casu más sonáu foi cuando la crisis de les vaques lloques. Daquella, los piensos animales que se suponía que podín causar la enfermedá, y de los qu'había almacenaes grandísimes cantidaes, lleváronse a los fornos de les cementeres, que cobraben subvenciones pola cantidá qu'incineraren. Nun ye l'únicu casu, nin con muncho. Cubiertes o aceite usao de motores tamién van a parar bien de veces a los fornos de les cementeres, que vienen a ocupar el llugar que tendríen de tener les impopulares plantes incineradores de basura. Esta práctica de quemar en fornos tien el preste de la patronal cementera española Oficiemen, qu'ufierta, dientro de les sos polítiques medioambientales el da-y a la sociedá les posibilidaes que puen aportar "pal tratamientu de residuos xeneraos n'otres actividaes industriales y humanes... "aportando una solución ecolóxica y segura a la xestión de determinaos tipos de residuos". Pa saber más sobre la quema de basura en cementeres, recomendamos lleer esti documentu de les xornaes d'amantes de la basura del 2001. Esti documentu apurre tamién una llista de los proyectos d'incineración esistentes, y nellos apaez yá la cementera d'Aboño como una de les que yá teníen d'aquella proyectos d'incineración.