La protesta marcó l'apertura del congresu del RIDEA

La pita de la Xunta Pola Defensa de la Llingua protagonizó ayeri l'apertura del Congresu d'Estudios Asturianos entamáu pol Real Institutu d'Estudios Asturianos (RIDEA), un congresu marcáu pola polémica por negase la institución a aceptar la llectura d'una ponencia n'asturianu presentada por Yolanda Magdalena.

L'actu de la inauguración del congresu, que se celebró ayeri nel auditoriu Príncipe Felipe, foi un claru espeyu de la situación que se vivió nes últimes selmanes a cuentu d'esta polémica causada pola institución, y asina, na conferencia inaugural, y énte la presencia de los directivos del RIDEA José Luis Pérez de Castro y Moisés Llordén Miñambres, amás de la Conseyera de Cultura Ana Rosa Migoya y el Rector de la Universidá d'Uviéu Juan Vázquez, apaeció una convidada especial cola que nun se contaba na persona de la pita de la Xunta Pola Defensa de la Llingua. Sentada na primer fila de butaques, la mascota reivindicativa de la organización asistió a la llectura de les conferencies inaugurales y abandonó l'auditoriu uvieín en compañía de les autoridaes, xuntándose a la salida del edificiu a la concentración de protesta convocada pola Xunta Pola Defensa de la Llingua baxo'l llema ", "Ridea antiasturianu, Migoya dimisión" y a la qu'asistieron cerca de 100 persones, ente ellos el miembru del RIDEA Xosé Lluis Campal, que decidiere retirar la so ponencia del congresu en solidaridá cola afectada Yolanda Magdalena. El filólogu y estudiosu calificó la movilización como "moralmente hixénica y necesaria" y declaró que "Asturies y lo asturiano nun merecen esti despreciu por parte del RIDEA".

Nun yera de la mesma opinión Ana Rosa Migoya. La Conseyera, qu'ayeri taba visiblemente enfadada pola concentración y pola presencia de la pita, defendió l'actitú del RIDEA en cuantes que l'asturianu "nun ye una llingua oficial" polo que la institución "nun valtó llexislación nenguna" anque tamién animó a la institución a "facer más promoción del asturianu".

Tamién participó na polémica'l Conseyeru de Xusticia, Francisco Javier García Valledor que dixo nun comunicáu que della xente responsable del RIDEA tien una "trayectoria reaccionaria" calificando de "mui grave" la decisión del institutu de nun aceptar la ponencia. Contradiciendo a la conseyera, Valledor afirma que "nenguna entidá pública tien autonomía p'actuar al marxe de la llei d'Usu y Promoción del Asturianu, nin p'asitiase en contra de la voluntá política d'un Gobiernu qu'echa a andar un plan de normalización de la llingua".