La propuesta de Ciudadanos sobre les llingües y l'accesu al emplegu públicu, valtada

|
Toni Cantó

L'asturianu tuvo presente nel alderique previu. Foro votó a favor de la iniciativa.

La Proposición de Llei de Ciudadanos sobre la igualdá nel accesu al emplegu públicu ensin discriminación por razones llingüístiques recibió'l refugu del Congresu por 176 votos a 168 gracies a los votos contrarios del PSOE, Xuníos Podemos y formaciones nacionalistes, mentes que Foro votó a favor xunto col PP y UPN. Ésta pretendía que les llingües cooficiales nun pudieren ser esixíes nos procesos de seleición públicos, sinón que pasaren a sumar como un méritu.

Toni Cantó encargóse de defender la propuesta de la formación naranxa, que provocó un intensu alderique en defensa de les llingües del Estáu y de los derechos de los sos falantes, debate nel que l'asturianu tamién tuvo presente. Asina, Oskar Matute, d'EH Bildu, señaló que lo que fai Ciudadanos cola mesma ye "persiguir, al igual qu'antaño'l dictador fascista, l'aragonés, l'asturianu, el gallegu, el catalán o l'eusquera. Pue que la próxima iniciativa de so vaya llanzada y les denomine direutamente dialeutos o llingües vernácules".

"Si nun quieren nel so Estáu, na so monarquía, nengún idioma distintu al castellanu en pie d'igualdá con ésti, nun faen más que danos más motivos pa crear repúbliques multillingües onde se pueda vivir n'eusquera, en gallegu, en catalán, n'asturianu o n'aragonés", siguió'l vascu. Mentes, Joan Mena, de Xuníos Podemos, acusó a Ciudadanos de querer convertir a España "na Vetusta de La Regenta", y, tres citar autores en toles llingües estatales, ente elles Vanessa Gutiérrez y Berta Piñán, apuntó que creerá que la formación de Cantó llucha polos derechos llingüísticos de toles persones "cuando el catalán se pueda falar nel Congresu, el gallegu se recupere ente la población moza o nos acompañen pidiendo que l'asturianu sía oficial n'Asturies".

Na semeya, Cantó nel momentu de defender la proposición de llei.

Contador Estadistiques