La proposición del PSOE sobre les llingües recibe crítiques de los coleutivos de defensa del idioma

La Xunta pola Defensa de la Llingua Asturiana (XDLA) y Iniciativa pol Asturianu llamenten la esclusión del asturianu nel so proyeutu.

El PSOE rexistró esta selmana una proposición de llei nel Congresu col envís de da-y puxu al emplegu de les llingües oficiales en tolos ámbitos de l'Alministración estatal. La batería de midíes presentada polos socialistes inclúi'l derechu de los ciudadanos a emplegar el so idioma maternu pa dirixise a cualesquier organismu, incluyíu la Casa del Rey; la emisión billingüe de documentos oficiales, como'l DNI, en cualquier puntu del Estáu; o la promoción de la pluralidá llingüística nel enseñu, ente otros.

L'asturianu, al nun ser oficial, queda fuera d'estes iniciatives que'l PSOE confía tenga l'apoyu de la mayoría del Congresu. Sicasí, la XDLA acusa al presidente del país y de la comisión xestora del PSOE, Javier Fernández, "de vetar l'asturianu dientro del proyeutu". "Los asturianos quedamos fuera, volvemos ser ciudadanos de segunda ensin los mesmos derechos que'l restu d'habitantes del Estáu", aseguren dende'l coleutivu, que recuerda que "vamos pagar colos nuestros impuestos l'usu d'otres llingües, pero vamos tener mil problemes pa usar la nuestra en casa".

"Too ello gracies al PSOE, un partíu qu'en Madrid afirma que l'afitamientu de cualquiera de les llingües españoles nun va en detrimentu de les otres, pero qu'equí –cola complicidá o pasividá de los demás grupos representaos na Xunta Xeneral–, nun usa la toponimia asturiana nos documentos oficiales, recorta a lo mínimo les ayudes a la industria de la llingua –un sector que xenera una cantidá importante de puestos de trabayu directos y indirectos– y mantién la RTPA como ferramienta d'aculturización, en contra de la mesma Llei d'Usu", conclúi la XDLA.

Non oficial, pero reconocida xurídicamente 

Iniciativa pol Asturianu, pela so parte, tresmitió al PSOE la so demanda de que "la llingua de los asturianos seya tenida en cuenta nesa propuesta llexislativa pues gocia d’un marcu de proteición que nun tien porque ser escluyente pa esta proposición". Esti reconocimientu xurídicu del idioma "fai que la sociedá civil asturiana tea en condiciones d’esixir que s’aplique la llei y qu’ésta se tenga en cuenta en casu de que s’amplien les condiciones de la mesma".

D'igual forma, la organización quier poner el focu nel testu de la proposición presentada polos socialistes que señala que "el fortalecimientu de cualquiera de les llingües españoles nun va en desterciu de les otres. Nun tien por qué esistir, y ye un erru decilo neses pallabres, una competición ente llingües, un xuegu de suma cero". Iniciativa pol Asturianu diz compartir "dafechamente" estes pallabres.