La proposición sobre pluralismu llingüísticu aprobada en Congresu asitia l'asturianu como "llingua menos difundida"

El Congresu de los Diputaos aprobó'l pasáu martes la proposición non de llei presentada pol Grupu Parlamentariu del PSOE, na que se defende un marcu de convivencia ente les estremaes llingües del estáu y na que s'emponderen los beneficios sociales y culturales de la cooficialidá. Al testu orixinal amestáronse-y delles enmiendes que nun faen referencia específica al casu del asturianu pero que sí-y dan indirectamente un grau de reconocimientu que nun taba presente nel testu orixinal. La proposición del PSOE criara angüeñes ente los defensores de la llingua asturiana porque nella rescamplaba la existencia d'un doble tratu en política llingüística por parte del PSOE n'Asturies, onde se considera que la oficialidá supón imposición y nel restu d'España, onde ésta trátase como un sinónimu de llibertá.

Énte estes enmiendes rescampla la que propunxo'l grupu parlamentariu catalán de Convergencia i Unió (CiU). Esta enmienda, que s'aceptó y a la que tuvo accesu Asturies.com, pide lliteralmente "propiciar un usu de les llingües menos difundíes normalizáu en tolos ámbitos de la vida cotidiana, nos territorios que constituyen el so dominiu llingüísticu". La enmienda de CiU, como sorrayó'l representante de Coalición Canaria en Congresu, ta pensada pal casu del aranés, la so redacción pue espurrise tamién a les llingües del estáu non oficiales, ente elles l'asturianu. Sicasí, fontes de la Xunta pola Defensa de la Llingua comentaron a Asturies.com que "nel testu definitivu de la Proposición conságrase una diferencia, que nun apaez nel testu constitucional, ente les llingües oficiales y les supuestamente menos difundíes", diferencia que "ye inaceptable dende'l puntu de vista asturianu".

Amás d'esta enmienda, el Plenu del Congresu aceptó otra presentada pol grupu parlamentariu d'Esquerra Republicana de Catalunya (ERC). Nella, la formación catalana esixe que l'Estáu Español cumpla los mandaos de la Carta Europea de Llingües Rexonales. L'Estáu Español yá firmare esta carta nel añu 2001, y organizaciones asturianes lleven reclamando d'entós p'acá que les instituciones asturianes cumplan con esti documentu.