La producción de la DOP Quesu Afuega’l Pitu aumentó un 9,5 por cientu

Esti domingu celebróse en La Foz el XXXVII ‘Certamen de Quesu d’Afuega’l Pitu’, que llevó nes dos modalidaes de blancu la Quesería Ca Sanchu y na de roxu, La Borbolla. La producción d’esti alimentu con DOP aumentó un 9,5 por cientu nel añu 2015, siendo’l total comercializáu de 121.996 quilos.

El certame de Morcín entamáu pola Hermandad de La Probe, que comenzó’l vienres con una verbena y siguió’l sábadu con otra, desendolcóse a lo llargo d’ayeri cola participación de siete productores y una bona presencia de públicu, animada a mercar quesos de les cuatro variedaes que se producen baxo la Denominación d’Orixe Protexida (DOP) Afuega’l Pitu: atroncáu blancu y roxu, y trapu blancu y roxu. Ente los gallardones entregaos nesta edición destaca l’Afuega’l Pitu d’Oru al Conceyu de Grau pol so compromisu con esti productu, mentes que l’escritor y espertu en quesu Luis Javier del Valle llevó’l títulu de Queseru Mayor d’Asturies. Ismael Fernández Ramírez encargóse de lleer el pregón.

La conseyera de Desarrollu Rural y Recursos Naturales, María Jesús Álvarez González, acudió a la fiesta del Afuega’l Pitu y aportó los bonos datos correspondientes al añu 2015, cuando la producción aumentó un 9,5 por cientu, al igual que la de lleche de les ganaderíes destinada a la ellaboración d’esti productu, que xubió a los 862.888 quilogramos. La socialista emponderó la celebración de feries agroalimentaries como la de La Foz, que dexen “una conexón direuta del productor col consumidor, compartiendo la innovación y los productos nuevos d’un quesu cenciello, d’una gran autenticidá, sabroso y versátil na cocina”, pa depués destacar la presencia de les queseríes na marca comercial ‘Alimentos del Paraíso’ entamada pol Gobiernu y l’aumentu de ventes d’esta DOP fuera del país.