La Procuradora Xeneral corrixe la convocatoria na que se discriminaba a los falantes d’asturianu

|

El recursu presentáu pol Aconceyamientu de Xuristes pol Asturianu (AXA) sobre la convocatoria de la Procuradora Xeneral d’un premiu de drechos humanos tuvo’l so efeutu. Agora va poder utilizase la llingua asturiana.
 
La reclamación d’AXA llevó a María Antonia Felgueroso, Procuradora Xeneral, a rectificar el testu de la convocatoria de la primer edición del Premiu denomáu ‘Amparu de Drechos y Llibertaes’, espublizáu’l 29 d’avientu. Nél señalábase que la presentación de candidatures d’entidaes ensin ánimu d’arriquecimientu p’algamar esti premiu por parte d’otres persones o coleutivos distintos debía ser “necesariamente” en castellanu, lo que supón una discriminación clara pa tolos asturfalantes. Tres el llabor d’AXA, el BOPA del 5 de febreru de 2011 asoleya una igua d’erros onde se señala qu’onde pon “les solicitúes y documentación axunta presentaránse necesariamente en castellanu”, diga “les solicitúes y documentación axunta presentaránse en castellanu. Tamién serán admisibles, de conformidá cola normativa d’aplicación, les solicitúes y documentos que se formulen en bable/asturiano”.
 
Pese a la modificación, esti coleutivu de xuristes en defensa del idioma manifiesta “tar fartucu de tantes inxustes agresiones escontra la ciudadanía asturfalante protagonizaes pol gobiernu d’Areces y los sos satélites, siendo asina que lo menos que se pue pidir a les autoridaes públiques ye una actitú bonal nel acatamientu de les lleis, xustamente tolo contrariu d’esta permanente rebeldía no que cinca al cumplimientu de la probe normativa que protexe l’usu de la llingua propia. Rebeldía y desacatu a les lleis que mos desixe a les organizaciones cíviques l’andar tres d’ellos, como la xusticia, una y otra vuelta, per xulgaos y tribunales”.

Contador Estadistiques